AQSh maxsus operatsiya kuchlari va Dengiz piyodalari korpusi kontingenti Tayvanda mahalliy qo‘shinlarni maxfiy ravishda o‘qitmoqda. Bu haqda AQShning yuqori martabali amaldoriga tayanib The Wall Street Journal (WSJ) xabar berdi.
Manbaga ko‘ra, AQSh maxsus operatsiya kuchlarining 20 ga yaqin xodimi Tayvan quruqlik qo‘shinlarining kichik guruhini shug‘ullantirmoqda. Dengiz piyodalari, o‘z navbatida, mahalliy dengiz floti bilan ishlayapti. Manbaning aniqlik kiritishicha, AQSh harbiylari Tayvanda kamida bir yildan buyon bo‘lib turibdi.
Nashrning qayd etishicha, Oq uy va Pentagon Tayvanda AQSh harbiylari borligi haqidagi ma’lumotga izoh berishdan bosh tortgan.
G‘arb OAVlari xabar berishicha, Xitoy Xalq Respublikasi (XXR) tashkil topgan kun nishonlangan 1-oktabrdan boshlab, Tayvan yaqinida XXR aviatsiyasi ortgani kuzatilmoqda. Tayvan rasmiylari mamlakatning bir tomonlama e’lon qilingan havo hujumiga qarshi mudofaa zonasida 4-oktabr, dushanba kuni XXR havo kuchlarining 56 samolyoti uchirilgani haqida xabar berdi. Hisobotlarda qayd etilishicha, dushanba va undan oldingi uch kun davomida Xitoyning 148 ta harbiy samolyoti ushbu hudud orqali uchib o‘tgan.
AQSh Davlat departamenti Xitoyning bunday harakatlaridan juda xavotirda ekanini bildirib, ularni provokatsion deb atadi. Tayvan mudofaa idorasi rahbari Syu Gochjen, o‘z navbatida, 2025-yilga kelib Pekin Tayvan muammosini harbiy kuch yordamida hal qilishga to‘liq tayyor bo‘lishini aytdi.
Tayvan masalasi 1949-yilda kommunistik Xitoy Xalq Respublikasi e’lon qilinib, Gomindan partiyasining bir qismi Tayvan oroliga joylashtirilganda paydo bo‘lgan. Pekin “yagona Xitoy tamoyilini” talab qilmoqda, unga ko‘ra, bir vaqtning o‘zida ham XXRni, ham Tayvandagi Xitoy Respublikasini tan olib bo‘lmaydi. Shu bilan birga, deyarli barcha yirik davlatlarida Taybeyning norasmiy madaniy va iqtisodiy idoralari mavjud.
Pekin va Tayvan o‘rtasidagi munosabatlar 2008—2016-yillar mobaynida ancha yaxshilandi, o‘shanda Tayvan ma’muriyati rahbari, Gomindan raisi Ma Inszyu edi. Biroq 2016-yilda Say Inven Tayvan ma’muriyati rahbari bo‘lganidan beri Pekin Tayvanga harbiy bosimni kuchaytirdi.
Izoh (0)