Buxoro viloyati, G‘ijduvon tumani hokimi Sherzod Ashurov o‘z xizmat xonasini olimpiada terma jamoasi yoshlariga bo‘shatib berdi, deya xabar bermoqda “Daryo” muxbiri.
Ta’kidlanishicha, tuman hokimi Sherzod Ashurov hokimlik binosida o‘ziga ajratilgan katta va keng xonani yoshlarga bo‘shatib bergan.
“Bundan keyin tuman hokimi xonasida 30 nafardan iborat olimpiada terma jamoasi o‘quvchilari fizika va matematika fani bo‘yicha maxsus dastur asosda o‘qitiladi. Maqsad fizika va matematika fanlari bo‘yicha viloyat, mamlakat hamda xalqaro miqyosda o‘tkaziladigan olimpiadalarda ularning munosib ishtirok etishini ta’minlashdir.
Qisqa fursatda ushbu xona ikki fanga mos tarzda eng so‘nggi rusumdagi axborot texnologiyalari, o‘quv va laboratoriya uskunalari, zarur adabiyotlar hamda ko‘rgazmali qurollar bilan to‘liq jihozlanadi. Shu yerning o‘zida uch mahal issiq ovqat bilan ta’minlanishadi.
O‘qituvchilar har oyda mahalliy budjetdan ajratilgan mablag‘lar hisobidan rag‘batlantirilib boriladi. Xalqaro olimpiadalar g‘olibi bo‘lgan o‘quvchi va o‘qituvchilarga alohida pul mukofotlari ajratiladi”, – deydi Sherzod Ashurov.
Tuman hokimiga ko‘ra, ayni paytda xonani mos tarzda jihozlash ishlari boshlab yuborilgan.
“Hokim faoliyatda yaxshi natija ko‘rsatishi, odamlar og‘irini yengil qilishi uchun hashamatli va hayhotday xonalarda o‘tirishi shartmas”, – dedi hokim.
Mavzuga doir:
- Sirdaryoda tuman hokimi 800 dan ortiq daraxtni kesishga ruxsat berdi
- “E’tiborsizligim sabab bo‘ldi”, “Barcha muammoni tumanda hal qilib bo‘lmaydi”, “Yangiligimdan foydalanishdi” — Buxoroning jazolangan hokimlari hayfsan olishiga sabab bo‘lgan masalalar haqida
- Birinchi maoshini kambag‘allarga hadya qilgan G‘uzor hokimi 5 mln so‘m pul mukofotini ham uysiz ayolga berdi
Izoh (0)