Namangan viloyatida 11 yoshli qizni urib yuborishdan qochib, qarama-qarshi yo‘nalishga chiqib ketgan “Moskvich” Nexia bilan to‘qnashdi. Ikki avtomobil o‘rtasida qolib ketgan qizaloq vafot etdi. Bu haqda Namangan viloyati IIB axborot xizmati xabar qildi.
Qayd etilishicha, 2021-yil 4-oktabr kuni soat 18:30 larda Burilma–Uchqo‘rg‘on yo‘lining 7-kilometrida, Uchqo‘rg‘on tumani “O‘ljato‘pi” MFY hududida, “M-412” rusumli avtomashinani ishonch qog‘ozi bilan boshqarib borayotgan haydovchi harakat vaqtida Uchqo‘rg‘on tumanida ota-onasi qaramog‘ida yashagan, tumandagi maktabning 3-sinfida o‘qigan, 2010-yilda tug‘ilgan qiz yo‘lga chiqib ketishi tufayli rulni keskin burgan.
Oqibatda harakat yo‘nalishini o‘zgartirib, qarama-qarshi yo‘nalishga chiqib ketib, qarshisidan harakatlanib kelayotgan, Uchqo‘rg‘on tumanida yashovchi, 1966-yilda tug‘ilgan fuqaro boshqaruvidagi Nexia-2 rusumli avtomashina bilan to‘qnashgan.
Ikkala avtomashina orasida qolib ketgan piyoda og‘ir tan jarohati olib, voqea joyida halok bo‘lgan.
Ushbu holat bo‘yicha Uchqo‘rg‘on tuman IIB huzuridagi TB tomonidan 2021-yil 4-oktabr kuni Jinoyat kodeksining 266-moddasi 2-qismi (odam o‘limiga sababchi bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.
Izoh (0)