Zangiota tumanidagi 1-son yuqumli kasalliklar shifoxonasida 160 nafarga yaqin bola davolanmoqda. Bu haqda ushbu shifoxona direktori Anvar Husanov SSV matbuot xizmatiga ma’lum qildi.
“Markazimiz 2 ming o‘ringa mo‘ljallangan. Hozir bu yerda 1600 nafar bemor muolaja olyapti. Ularning 26 foizi oltmish yoshdan oshgan fuqarolar bo‘lsa, 160 nafarga yaqini bolalardan iborat”, — degan Anvar Husanov.
Uning aytishicha, jami bemorlarning 77 foizi o‘rta og‘ir, 20 foizi og‘ir, 3 foizi esa o‘ta og‘ir holatda. Ayni paytda 153 nafar bemor jonlantirish bo‘limida davolanyapti. Kuniga o‘rta hisobda 100—150 nafar bemor qabul qilinib, ularni 7—10 kun davomida salomatligini tiklash choralari ko‘rilmoqda.
“Markaz shifokorlarining qayd etishicha, kasallanish ko‘rsatkichlarini bundan ham pasaytirish mumkin. Buning eng samarali va oqilona yo‘li — o‘z vaqtida emlanish. Qolaversa, ko‘cha-ko‘yda, jamoat joylarida fuqarolarning karantin qoidalariga yetarli darajada e’tibor qaratmayotgani ham epidemiologik vaziyatga salbiy ta’sir ko‘rsatmoqda. Statistik ko‘rsatkichlardan ham ayonki, og‘ir va o‘ta og‘ir holatdagi bemorlarning katta qismi keksa yoshdagi insonlar. Ularda kasallik asoratlari og‘ir kechishi va tuzalish muddati uzayib ketishi kuzatilmoqda. Bunday bemorlar bilan suhbatlashganimizda, ular vaksina olishni paysalga solib kelganidan afsusda ekanliklarini aytishdi.
Ikkinchi salbiy holat shuki, COVID-19 ni yuqtirib olayotganlar orasida bolalar soni ham ortib borayotir. Misol uchun, ayni kunda Zangiota 1-son yuqumli kasalliklar shifoxonasiga kuniga o‘rtacha 25 nafar o‘g‘il-qiz yotqizilyapti. Chunki yurtimizda keng tarqalgan delta shtammi bolalarni ham chetlab o‘tayotgani yo‘q”, — deb ta’kidlagan shifoxona direktori.
O‘zbekistonda 28-sentabrdan 12 yoshdan katta bolalarni ham koronavirusga qarshi Pfizer vaksinasi bilan ixtiyoriy ravishda emlashga ruxsat berilgandi. Anvar Husanovning so‘zlariga ko‘ra, shu kungacha 117 ming nafardan ortiq bola vaksina olib ulgurdi. Ularning hech birida nojo‘ya ta’sirlar kuzatilgani yo‘q.
“Shunday ekan, bu amaliyotni yanada ommallashtirish barchamiz uchun foydali. Chunki bolajonlarimiz nafaqat bemor, balki virus tashuvchi bo‘lib qolishlari mumkinligini ham yoddan chiqarmasligimiz zarur”, — deb ta’kidlagan shifokor.
Izoh (0)