Зангиота туманидаги 1-сон юқумли касалликлар шифохонасида 160 нафарга яқин бола даволанмоқда. Бу ҳақда ушбу шифохона директори Анвар Ҳусанов ССВ матбуот хизматига маълум қилди.
«Марказимиз 2 минг ўринга мўлжалланган. Ҳозир бу ерда 1600 нафар бемор муолажа оляпти. Уларнинг 26 фоизи олтмиш ёшдан ошган фуқаролар бўлса, 160 нафарга яқини болалардан иборат», — деган Анвар Ҳусанов.
Унинг айтишича, жами беморларнинг 77 фоизи ўрта оғир, 20 фоизи оғир, 3 фоизи эса ўта оғир ҳолатда. Айни пайтда 153 нафар бемор жонлантириш бўлимида даволаняпти. Кунига ўрта ҳисобда 100—150 нафар бемор қабул қилиниб, уларни 7—10 кун давомида саломатлигини тиклаш чоралари кўрилмоқда.
«Марказ шифокорларининг қайд этишича, касалланиш кўрсаткичларини бундан ҳам пасайтириш мумкин. Бунинг энг самарали ва оқилона йўли — ўз вақтида эмланиш. Қолаверса, кўча-кўйда, жамоат жойларида фуқароларнинг карантин қоидаларига етарли даражада эътибор қаратмаётгани ҳам эпидемиологик вазиятга салбий таъсир кўрсатмоқда. Статистик кўрсаткичлардан ҳам аёнки, оғир ва ўта оғир ҳолатдаги беморларнинг катта қисми кекса ёшдаги инсонлар. Уларда касаллик асоратлари оғир кечиши ва тузалиш муддати узайиб кетиши кузатилмоқда. Бундай беморлар билан суҳбатлашганимизда, улар вакцина олишни пайсалга солиб келганидан афсусда эканликларини айтишди.
Иккинчи салбий ҳолат шуки, COVID-19 ни юқтириб олаётганлар орасида болалар сони ҳам ортиб бораётир. Мисол учун, айни кунда Зангиота 1-сон юқумли касалликлар шифохонасига кунига ўртача 25 нафар ўғил-қиз ётқизиляпти. Чунки юртимизда кенг тарқалган дельта штамми болаларни ҳам четлаб ўтаётгани йўқ», — деб таъкидлаган шифохона директори.
Ўзбекистонда 28 сентябрдан 12 ёшдан катта болаларни ҳам коронавирусга қарши Pfizer вакцинаси билан ихтиёрий равишда эмлашга рухсат берилганди. Анвар Ҳусановнинг сўзларига кўра, шу кунгача 117 минг нафардан ортиқ бола вакцина олиб улгурди. Уларнинг ҳеч бирида ножўя таъсирлар кузатилгани йўқ.
«Шундай экан, бу амалиётни янада оммаллаштириш барчамиз учун фойдали. Чунки болажонларимиз нафақат бемор, балки вирус ташувчи бўлиб қолишлари мумкинлигини ҳам ёддан чиқармаслигимиз зарур», — деб таъкидлаган шифокор.
Изоҳ (0)