Наманган вилоятида 11 ёшли қизни уриб юборишдан қочиб, қарама-қарши йўналишга чиқиб кетган «Москвич» Nexia билан тўқнашди. Икки автомобиль ўртасида қолиб кетган қизалоқ вафот этди. Бу ҳақда Наманган вилояти ИИБ ахборот хизмати хабар қилди.
Қайд этилишича, 2021 йил 4 октябрь куни соат 18:30 ларда Бурилма–Учқўрғон йўлининг 7-километрида, Учқўрғон тумани «Ўлжатўпи» МФЙ ҳудудида, «М-412» русумли автомашинани ишонч қоғози билан бошқариб бораётган ҳайдовчи ҳаракат вақтида Учқўрғон туманида ота-онаси қарамоғида яшаган, тумандаги мактабнинг 3-синфида ўқиган, 2010 йилда туғилган қиз йўлга чиқиб кетиши туфайли рулни кескин бурган.
Оқибатда ҳаракат йўналишини ўзгартириб, қарама-қарши йўналишга чиқиб кетиб, қаршисидан ҳаракатланиб келаётган, Учқўрғон туманида яшовчи, 1966 йилда туғилган фуқаро бошқарувидаги Nexia-2 русумли автомашина билан тўқнашган.
Иккала автомашина орасида қолиб кетган пиёда оғир тан жароҳати олиб, воқеа жойида ҳалок бўлган.
Ушбу ҳолат бўйича Учқўрғон туман ИИБ ҳузуридаги ТБ томонидан 2021 йил 4 октябрь куни Жиноят кодексининг 266-моддаси 2-қисми (одам ўлимига сабабчи бўлган транспорт бошқариш хавфсизлиги қоидаларини бузиш) билан жиноят иши қўзғатилган.
Изоҳ (0)