6 октябрь куни Ўзбекистон ташқи ишлар вазири Абдулазиз Комилов Ватиканнинг Ўзбекистондаги апостол нунсийси (элчиси) этиб тайинланган (қароргоҳи Москва шаҳрида) архиепископ Жованни д’Аниеллони қабул қилди. Бу ҳақда вазирликнинг расмий вакили хабар берди.
Элчининг ишонч ёрлиқларини қабул қилиб олган Абдулазиз Комилов уни масъул лавозимга тайинлангани билан табриклаган. Ўзбекистон ва Ватикан ўртасида турли миллатлар ва динлар вакиллари ўртасидаги дўстлик ҳамда ўзаро алоқаларни мустаҳкамлашга қаратилган ижобий ҳамкорлик тажрибаси тўплангани қайд этилган.
«Ўзбекистон Ватиканни ислом ва христианлик динлари ўртасидаги мулоқотни ривожлантиришда муҳим ҳамкор деб билади», — дейди Абдулазиз Комилов.
Томонларнинг турли даражадаги конфессиялараро мулоқотни янада мустаҳкамлаш ва фаоллаштиришга ўзаро тайёрлиги билдирилган.
«Ватикан элчисига Ўзбекистонда миллатлараро тотувлик ва диний бағрикенгликни мустаҳкамлаш, фуқароларнинг диний соҳадаги ҳуқуқ ва эркинликларини ҳар томонлама ҳимоя қилиш борасида олиб борилаётган ишлар ҳақида маълумот берилди», — дейилади хабарда.
Эслатиб ўтамиз, Пестум архиепископи Жованни д’Аниелло Ўзбекистондаги янги апостол нунсийси этиб 2021 йилнинг январида тайинланганди. 2020 йилнинг декабрида Ўзбекистон элчиси Жаҳонгир Ғаниев Рим-католик черкови раҳбари Францискга ишонч ёрлиғи топширган эди.
Изоҳ (0)