O‘zbekistonda kriptovalyutalarni ayirboshlash bilan bog‘liq noqonuniy platformalar faoliyati avj olgani ma’lum bo‘ldi, deb xabar beradi Prezident huzuridagi Loyiha boshqaruvi milliy agentligi.
“Mazkur turdagi platformalar manzillarini boshqa davlatlarda ro‘yxatdan o‘tkazgan. Ular O‘zbekistonda serverlarini o‘rnatmasdan, ko‘p holatlarda fuqarolarning shaxsiy ma’lumotlarini so‘rab olgan holda, ularga kripto-aktivlarni sotish, sotib olish yoki ayirboshlashni taklif etmoqda”, — deyiladi xabarda.
Noqonuniy platformalarga misol qilib quyidagilarni ko‘rsatish mumkin:
- https://webmoneytashkent.com;
- https://wmztashkent.com;
- https://wm-torg.com;
- https://uzwmz.com;
- https://blockchainuz.com;
- https://bitcointashkent.com.
Bu turdagi platformalar yordamida kripto-aktivlar bilan o‘tkazilayotgan operatsiyalar uchun hech qanday huquqiy javobgarlikka tortish imkoni mavjud emas. Ular o‘tkazilayotgan bitimlar qonuniyligini, fuqarolar shaxsiy ma’lumotlari saqlanishini ta’minlanishiga kafolat bera olmasligini inobatga olib, agentlik fuqarolarni imkon qadar hushyor bo‘lishga chaqiradi.
Agentlik O‘zbekiston fuqarolaridan hududida shubhali sxemalar asosida kripto-aktivlar yordamida ish yuritayotgan ayrim kompaniyalar yoki shaxslarning faoliyati to‘g‘risida biron bir ma’lumot bo‘lsa, qonunda belgilangan tartibda huquqni muhofaza qilish organlariga xabar berishlarini so‘raydi.
Shuningdek, kripto-aktivlarni noqonuniy maqsadlarda yoki firibgarlik uchun ishlatayotgan kompaniyalar haqida ma’lumot bo‘lsa, agentlikning fraud@napm.uz elektron manziliga tegishli ma’lumotlarni yuborish mumkin.
Shu bilan birga, “Litsenziyalash, ruxsat berish va xabardor qilish tartib-tamoyillari to‘g‘risida”gi qonunga va “O‘zbekiston Respublikasida raqamli iqtisodiyotni rivojlantirish chora-tadbirlari to‘g‘risida”gi Prezident qaroriga muvofiq kripto-aktivlar aylanmasi sohasidagi, jumladan, kripto-aktivlar savdosi bo‘yicha kripto-birjalar yaratish faoliyati litsenziyalanishi lozimligi belgilangan.
Avvalroq Toshkentda kriptovalyuta savdosi bilan noqonuniy shug‘ullangan shaxslarga jinoiy ish ochilgani, Toshkentda bitkoin savdosi bilan noqonuniy shug‘ullanib, 3 million dollar ayirboshlagan shaxs qo‘lga olingani to‘g‘risida xabar berilgandi.
Izoh (0)