Ўзбекистонда криптовалюталарни айирбошлаш билан боғлиқ ноқонуний платформалар фаолияти авж олгани маълум бўлди

Ўзбекистонда криптовалюталарни айирбошлаш билан боғлиқ ноқонуний платформалар фаолияти авж олгани маълум бўлди, деб хабар беради Президент ҳузуридаги Лойиҳа бошқаруви миллий агентлиги.

«Мазкур турдаги платформалар манзилларини бошқа давлатларда рўйхатдан ўтказган. Улар Ўзбекистонда серверларини ўрнатмасдан, кўп ҳолатларда фуқароларнинг шахсий маълумотларини сўраб олган ҳолда, уларга крипто-активларни сотиш, сотиб олиш ёки айирбошлашни таклиф этмоқда», — дейилади хабарда.

Ноқонуний платформаларга мисол қилиб қуйидагиларни кўрсатиш мумкин:

1. https://webmoneytashkent.com;
2. https://wmztashkent.com;
3. https://wm-torg.com;
4. https://uzwmz.com;
5. https://blockchainuz.com;
6. https://bitcointashkent.com.

Бу турдаги платформалар ёрдамида крипто-активлар билан ўтказилаётган операциялар учун ҳеч қандай ҳуқуқий жавобгарликка тортиш имкони мавжуд эмас. Улар ўтказилаётган битимлар қонунийлигини, фуқаролар шахсий маълумотлари сақланишини таъминланишига кафолат бера олмаслигини инобатга олиб, агентлик фуқароларни имкон қадар ҳушёр бўлишга чақиради.

Агентлик Ўзбекистон фуқароларидан ҳудудида шубҳали схемалар асосида крипто-активлар ёрдамида иш юритаётган айрим компаниялар ёки шахсларнинг фаолияти тўғрисида бирон бир маълумот бўлса, қонунда белгиланган тартибда ҳуқуқни муҳофаза қилиш органларига хабар беришларини сўрайди.

Шунингдек, крипто-активларни ноқонуний мақсадларда ёки фирибгарлик учун ишлатаётган компаниялар ҳақида маълумот бўлса, агентликнинг fraud@napm.uz электрон манзилига тегишли маълумотларни юбориш мумкин.

Шу билан бирга, «Лицензиялаш, рухсат бериш ва хабардор қилиш тартиб-тамойиллари тўғрисида»ги қонунга ва «Ўзбекистон Республикасида рақамли иқтисодиётни ривожлантириш чора-тадбирлари тўғрисида»ги Президент қарорига мувофиқ крипто-активлар айланмаси соҳасидаги, жумладан, крипто-активлар савдоси бўйича крипто-биржалар яратиш фаолияти лицензияланиши лозимлиги белгиланган.

Аввалроқ Тошкентда криптовалюта савдоси билан ноқонуний шуғулланган шахсларга жиноий иш очилгани, Тошкентда биткоин савдоси билан ноқонуний шуғулланиб, 3 миллион доллар айирбошлаган шахс қўлга олингани тўғрисида хабар берилганди.