Durdona Nishonboyeva ikkinchi farzandini dunyoga keltirishi arafasida shifokorlar unga og‘ir bir xabarni yetkazgan — bola yurak nuqsoni bilan tug‘iladi va, katta ehtimol bilan, yashab ketolmaydi. “Bunday gapni eshitish juda yomon bo‘larkan, yomon ahvolga tushganman”, — deya tan oladi ona. Hayotga, yashashga intilishi kuchli bola tug‘ilgan, yuragida bir marta jarrohlik amaliyotini ham o‘tkazgan.
Ammo bolaning ahvoli yanada yaxshilanishi uchun ikkinchi operatsiyani ham o‘tkazish zarur edi. Shu bois ona va bolani Respublika ixtisoslashtirilgan jarrohlik ilmiy-amaliy tibbiyot markazi (xalq tirida “Grudnoy”)ga yuborishgan. Markaz mutaxassislari bola kuchga to‘lishi, hech bo‘lmasa uch yosh bo‘lishi kerakligini, yo‘qsa operatsiyani ko‘tara olmasligini tushuntirib, oxirida: “Imkoniyatingiz bo‘lsa, Hindistonga olib boring”, deb taklif qilgan.
Durdonaning oilasida bunday imkoniyat yo‘q edi. Ammo ayni shu vaqtda O‘zbekistonda u kabi turmushda qiynalgan ayollarning mushkulini oson qilishda o‘rni katta bo‘lgan “Ayollar daftari” joriy qilinib, yordamga muhtoj ayollarning ro‘yxatlari shakllantirila boshlangan edi. Durdona Nishonboyeva ham mahalla orqali ushbu “daftar”ga kiritildi va o‘g‘lining ikkinchi operatsiyasi uchun zarur bo‘lgan mablag‘ shu “daftar” orqali to‘lab berildi.
“To‘g‘risi, ikkinchi operatsiyasida rosa qo‘rqdim. Shifokorlar bola tirik chiqmasligi ham mumkinligi, bir yog‘i Xudodan ekanini aytgandi. Yo‘q, keyin jarroh ham operatsiyadan xursand chiqdi. O‘sha lahzada mendan baxtli odam yo‘q edi, chunki menga bolamni qaytarib berishdi. Prezident tashabbusi bilan ‘Ayollar daftari’ ochilgani, ayollarga shunchalik yordam ko‘rsatilgani sabab bolam shu holatga keldi”, — deydi minnatdorlik bilan ona.
“Ayollar daftari” haqida
2020-yil avgustida Prezident Shavkat Mirziyoyev ishsiz yoshlar uchun “Yoshlar daftari”, ishsiz ayollar yoki boquvchisiz qolgan oilalar uchun “Ayollar daftari”ni joriy etishni taklif qilgan edi. Bundan avvalroq yordamga muhtoj ehtiyojmand oilalar haqidagi axborotni o‘zida jamlagan “Temir daftar” ro‘yxati joriy etilgan edi.2021-yil yanvarida “Ayollar daftari” tushunchasi qonunchilikda o‘z aksini topdi. Bunda ushbu ro‘yxatga kimlar kiritilishi, shuningdek, ro‘yxatga kiritilgan ayollarga ko‘rsatiladigan yordam turlari belgilab qo‘yildi. Xususan, ushbu ro‘yxatga kiritilgan ayollarga tadbirkorlik faoliyatini yo‘lga qo‘yishi uchun bazaviy hisoblash miqdorining 150 barobari (36,75 million so‘m)gacha bo‘lgan miqdorda kreditlar beriladi.
O‘zbekiston prezidentligiga Xalq demokratik partiyasidan ko‘rsatilgan nomzod Maqsuda Vorisova UzReport telekanaliga bergan intervyusida “...‘Ayollar daftari’ yaxshi tashabbus bo‘lgani, biroq uni joylarda to‘g‘ri tushunib, ishni to‘g‘ri tashkil qilishganmi, degan savollar ochiq qolgani” haqida fikr bildirgan.
Bunga javoban amaldagi prezident (ayni vaqtda O‘zLiDePdan prezidentlikka ko‘rsatilgan nomzod) Shavkat Mirziyoyev, jumladan, shunday dedi: “Bir xillar chiqib aytyapti, ‘Temir daftar’ noto‘g‘ri bo‘ldi, ‘Ayollar daftari’ noto‘g‘ri bo‘ldi... Agar u daftar bo‘lmaganda, koronavirusda kimga berardik yordamni? Agar ‘Temir daftar’ bo‘lmaganida, u bechora oilaga kim borib qarardi?”.
Izoh (0)