Rossiya Bosh prokuraturasi O‘zbekiston hududida jinoyat sodir etgan fuqarolarni jinoiy javobgarlikka tortish uchun O‘zbekistonning vakolatli organlariga topshirdi. Bu haqda idora matbuot xizmatiga tayanib, “Gazeta.uz” xabar berdi.
Ma’lum qilinishicha, J.B. xavfli retsidivist hisoblanib, Samarqand viloyati Qo‘shrabod tumani Bolalar va o‘smirlar sport maktabida buxgalter bo‘lib ishlagan. U sobiq maktab direktori va boshqa shaxslar bilan birgalikda 2018-yil dekabridan 2019-yil dekabriga qadar muassasa xodimlarining imzosini qalbakilashtirish orqali ish haqi bayonotlariga yolg‘on ma’lumotlar kiritgan. Shunday qilib, u ishonib topshirilgan pul mablag‘larini o‘g‘irlaganlikda ayblanmoqda.
Fuqaro Q.J. 2018-yil 7-noyabrdan 2019-yil 4-martgacha Toshkent shahrida ombor mudiri bo‘lib ishlayotganda xomashyo, materiallar va tayyor mahsulotni katta miqdorda o‘g‘irlab ketganlikda ayblanmoqda.
Rossiya Bosh prokuraturasi, shuningdek, O‘zbekiston Bosh prokuraturasining uyushgan jinoiy guruh tarkibida o‘g‘rilikda ayblanayotgan J.M. va qasddan badanga o‘rtacha og‘irlikdagi shikast yetkazishda ayblangan F.I.ni ekstraditsiya qilish haqidagi so‘rovlarini qondirgan.
To‘rt erkak Rossiyada turli vaqtlarda hibsga olingan. O‘zbekiston Bosh prokuraturasi ularni ekstraditsiya qilish uchun so‘rovlar tayyorlagan.
Rossiya Bosh prokuraturasining ularni ekstraditsiya qilish to‘g‘risidagi qarorlari qonuniy kuchga kirgan, Rossiya Federal jazoni ijro etish xizmatiga ularni zarur xavfsizlik choralarini ko‘rgan holda topshirish vazifasi qo‘yilgan. Ular maxsus kuzatuvchilar hamrohligida O‘zbekistonga yetkaziladi.
Eslatib o‘tamiz, 2020-yilning dekabrida Rossiya jinoiy javobgarlikka tortish uchun bir yo‘la 56 O‘zbekiston fuqarosini mamlakatga topshirgan edi.
Izoh (0)