Namanganda Milliy gvardiya xodimi mehribonlik uyining 5 nafar tarbiyalanuvchisini qaramog‘iga oldi. Bu haqda “Daryo” muxbiri Azizbek Abduvaliyev xabar bermoqda.
Podpolkovnik Bahodir Qo‘ldoshev Milliy gvardiya Namangan viloyat boshqarmasida xizmat qiladi. Namangan shahridagi 26-mehribonlik uyidan 5 nafar tarbiyalanuvchi — 4 nafar qiz va bir o‘g‘ilni olishga qaror qildi.
Tarbiyalanuvchilarning eng kattasi 14, eng kichigi esa 4 yoshda. Ulardan ikki nafari — Diyorbek va Shirin aka-singil.
“Oyim saraton kasalligidan olamdan o‘tgan, dadam tashlab ketganlar. Mehribonlik uyida uch yildan beri tarbiyalanaman. Bu yerda ko‘p narsa o‘rgandim — tikuvchilik, pishiriqlar tayyorlash, hatto non yopishgacha bilaman. Sportga qiziqaman, kurash, og‘ir atletika bilan shug‘ullanaman. Toshkentdagi musobaqada o‘rin ham olib keldim. Kelgusida psixolog bo‘lmoqchiman. O‘zim shuncha mehr ko‘rdim, endi bu mehrni boshqalarga ham ulashmoqchiman. Bizni harbiylar oilasi bag‘riga olayotganimdan xursandman. Men bilan birga bu oilaga ketayotgan qizlar bilan dugonadek bo‘lib ketganmiz, Diyorbek va Shirinni esa o‘z ukalarimdek ko‘raman”, — deydi 14 yashar Sevinch O‘rinboyeva.
Bahodir Qo‘ldoshevning oilasida uch nafar farzand — ikki o‘g‘il va bir qiz tarbiyalanmoqda. Endi ularning safiga yana 5 nafar bola qo‘shildi va oilaviy mehribonlik uyi tashkil topdi. Namangan shahridagi Qo‘ldoshevlar oilasi yashayotgan mahalla nomidan kelib chiqib va ramziy ma’noda unga “Orzu” deya nom berildi.
“To hujjatlar rasmiylashmaguncha bu haqda hech kimga, hatto eng yaqin qarindoshlarimizga ham bildirmagandim. Ular bolalarni bag‘rimizga olayotganimizni shu munosabat bilan uyimizga chorlaganimizda bilishdi. Bizda ham shunday niyat bor edi, ilgarilab ketibsan. Endi ularni voyaga yetkazishda biz ham chetda turmaymiz, deyishdi”, — deya hikoya qiladi Bahodir Qo‘ldoshev.
Milliy gvardiya Namangan viloyat boshqarmasi boshlig‘i, polkovnik Sobitxon Mirzayevning aytishicha, Namangandagi 26-mehribonlik uyi otaliqqa olinganida bu yerda 41 nafar tarbiyalanuvchi bor edi. Bugunga kelib ulardan 19 nafari qolyapti.
Ularni ham yaqinlariga qaytarish, patronatga berish va oilaviy mehribonlik uylariga joylashtirish bo‘yicha tizimli ishlar olib borilmoqda.
26-mehribonlik uyi direktori Dilorom Abdurahimovaning bildirishicha, ayni paytda Namanganda yana ikkita oilaviy mehribonlik uyini tashkil etish uchun hozirlik ko‘rilmoqda.
Izoh (0)