Наманганда Миллий гвардия ходими меҳрибонлик уйининг 5 нафар тарбияланувчисини қарамоғига олди. Бу ҳақда «Дарё» мухбири Азизбек Абдувалиев хабар бермоқда.
Подполковник Баҳодир Қўлдошев Миллий гвардия Наманган вилоят бошқармасида хизмат қилади. Наманган шаҳридаги 26-меҳрибонлик уйидан 5 нафар тарбияланувчи — 4 нафар қиз ва бир ўғилни олишга қарор қилди.
Тарбияланувчиларнинг энг каттаси 14, энг кичиги эса 4 ёшда. Улардан икки нафари — Диёрбек ва Ширин ака-сингил.
«Ойим саратон касаллигидан оламдан ўтган, дадам ташлаб кетганлар. Меҳрибонлик уйида уч йилдан бери тарбияланаман. Бу ерда кўп нарса ўргандим — тикувчилик, пишириқлар тайёрлаш, ҳатто нон ёпишгача биламан. Спортга қизиқаман, кураш, оғир атлетика билан шуғулланаман. Тошкентдаги мусобақада ўрин ҳам олиб келдим. Келгусида психолог бўлмоқчиман. Ўзим шунча меҳр кўрдим, энди бу меҳрни бошқаларга ҳам улашмоқчиман. Бизни ҳарбийлар оиласи бағрига олаётганимдан хурсандман. Мен билан бирга бу оилага кетаётган қизлар билан дугонадек бўлиб кетганмиз, Диёрбек ва Ширинни эса ўз укаларимдек кўраман», — дейди 14 яшар Севинч Ўринбоева.
Баҳодир Қўлдошевнинг оиласида уч нафар фарзанд — икки ўғил ва бир қиз тарбияланмоқда. Энди уларнинг сафига яна 5 нафар бола қўшилди ва оилавий меҳрибонлик уйи ташкил топди. Наманган шаҳридаги Қўлдошевлар оиласи яшаётган маҳалла номидан келиб чиқиб ва рамзий маънода унга «Орзу» дея ном берилди.
«То ҳужжатлар расмийлашмагунча бу ҳақда ҳеч кимга, ҳатто энг яқин қариндошларимизга ҳам билдирмагандим. Улар болаларни бағримизга олаётганимизни шу муносабат билан уйимизга чорлаганимизда билишди. Бизда ҳам шундай ният бор эди, илгарилаб кетибсан. Энди уларни вояга етказишда биз ҳам четда турмаймиз, дейишди», — дея ҳикоя қилади Баҳодир Қўлдошев.
Миллий гвардия Наманган вилоят бошқармаси бошлиғи, полковник Собитхон Мирзаевнинг айтишича, Намангандаги 26-меҳрибонлик уйи оталиққа олинганида бу ерда 41 нафар тарбияланувчи бор эди. Бугунга келиб улардан 19 нафари қоляпти.
Уларни ҳам яқинларига қайтариш, патронатга бериш ва оилавий меҳрибонлик уйларига жойлаштириш бўйича тизимли ишлар олиб борилмоқда.
26-меҳрибонлик уйи директори Дилором Абдураҳимованинг билдиришича, айни пайтда Наманганда яна иккита оилавий меҳрибонлик уйини ташкил этиш учун ҳозирлик кўрилмоқда.
Изоҳ (0)