“O‘zavtosanoat” kompaniyasi UzAuto Motors zavodi bazasida Chevrolet Onix va Tracker avtomobillarini ishlab chiqarishni yo‘lga qo‘yish uchun 427,7 million dollar yo‘naltirishni rejalashtirmoqda. Bu haqda Investitsiyalar va tashqi savdo vazirligi tomonidan “O‘zbekiston Respublikasining 2022–2024-yillarga mo‘ljallangan Investitsiya dasturini amalga oshirish chora-tadbirlari to‘g‘risida”gi Prezident qarori loyihasida so‘z boradi.
Loyiha Asaka shahridagi zavodda 2022-yil sentabrida ishga tushishi va uning yillik ishlab chiqarish quvvati 190 ming avtomobilni tashkil etishi kutilmoqda. Shuningdek, loyihaga 2022-yilda yana 31 million dollar yo‘naltiriladi.
Bundan tashqari, UzAuto Motors Powertrain zavodida yangi avtomobil modellari uchun har yili 185 mingta dvigatel ishlab chiqarishni yo‘lga qo‘yish rejalashtirilmoqda. Ishlab chiqarishni tashkil etish uchun 2020−2023-yillarda 190,8 million dollar ajratish belgilangan.
Eslatib o‘tamiz, Chevrolet Onix avtomobilini yagona platformadagi ishlab chiqarish imkonini beradigan o‘rnatish va ishga tushirish ishlari 2021-yilning iyul—avgust oyida olib borildi. Sentabr o‘rtalarida esa ijtimoiy tarmoqlarda Onix avtomobili 13 ming dollardan boshlab sotuvga chiqqani aytilgan xabarlar tarqaldi. Biroq UzAuto Motors ushbu xabarlar asossiz ekanligini aytib chiqdi.
Ma’lumotlarga ko‘ra, Chevrolet Onix va Tracker bitta platformada yig‘iladi. Yangi platformani joriy etish dasturi yangi ishlab chiqarish tizimiga o‘tishni, avtomobillar qismlarini mahalliylashtirilish va moslashtirishga imkon beradi. UzAuto Motors’ning Asaka shahridagi zavodida yangi platformani joriy etish dasturini amalga oshirish uchun qo‘shimcha tarzda yana 500 nafarga yaqin xorijiy mutaxassis jalb qilingan.
Izoh (0)