UzAuto Motors kompaniyasida boshqaruv va ishlab chiqarishni bosqichma-bosqich o‘zgartirish ishlari doirasida, yagona platformadagi yangi avtomobil modellarini ishlab chiqarish yo‘lga qo‘yilishi rejalashtirilgan. Bu haqda kompaniya matbuot xizmati xabar qildi.

Foto: “Daryo” / Madina Nurman

Qayd etilishicha, investitsiyalar hajmini optimallashtirish, mahalliylashtirish darajasini oshirish hamda ishlab chiqarish xarajatlarini kamaytirish imkonini beruvchi ushbu platforma asosida bir nechta modellarni ishlab chiqarish yo‘lga qo‘yiladi.

Chevrolet Onix va Tracker modellarini o‘zlashtirish doirasida ishlab chiqarish imkonini beradigan o‘rnatish va ishga tushirish ishlari 2021-yilning 15-iyul sanasidan – 21-avgust sanasigacha rejalashtirilgan.

Ma’lum qilinishicha, Chevrolet Onix va Tracker bitta platformada yig‘iladi. Yangi platformani joriy etish dasturi yangi ishlab chiqarish tizimiga o‘tishni, avtomobillar qismlarini mahalliylashtirilish va moslashtirishga imkon beradi.

UzAuto Motors’ning Asaka shahridagi zavodida yangi platformani joriy etish dasturini amalga oshirish uchun qo‘shimcha tarzda yana 500 nafarga yaqin xorijiy mutaxassislar jalb qilindi.

“UzAuto Motors tayyor mahsulotni yetkazib berish bo‘yicha barcha shartnoma majburiyatlarini o‘z vaqtida va to‘liq bajarilishini ta’minlaydi. Rejalashtirilgan modernizatsiya ishlari oldindan tuzilgan transport vositalarini yetkazib berish jadvaliga ta’sir qilmaydi”, – deyiladi xabarda.

Bundan avval UzAuto Motors Chevrolet Onix’ni sotuvga chiqarishdan avval turli soha vakillari va blogerlar ishtirokida sinovdan o‘tkazgani, UzAuto Motors Cobalt’ning yangi ranglari paydo bo‘lgani haqidagi xabarlarni rad etgani hamda O‘zbekistonda bir yil ichida yengil avtomobil eksporti qariyb 85 mln dollarga oshgani haqida xabar berilgandi.