14-sentabr kuni  ijtimoiy tarmoqlarda Onix avtomobili 13 ming dollardan boshlab sotuvga chiqqani aytilgan video keng tarqaldi. UzAuto Motors bu ma’lumotning asossiz ekanligini ma’lum qildi.

Foto: UzAuto Motors

“Bugungi kunda sotuvda mavjud bo‘lgan avtomobillar ro‘yxati bilan uzautomotors.com sayti orqali tanishishingiz mumkin. Qolaversa, Chevrolet Onix rusumli avtomobilning sotuvi boshlanishi haqida biz rasmiy kanallarimizda e’lon qilamiz. Shuningdek, keltirilgan videoda sotuv boshlangani haqida hech qanday gap yo‘qligini inobatga oling”, — deyiladi kompaniya xabarida.

Bundan tashqari, yonilg‘i sarfi tarqalgan videoda aytilganidek 8 litr emas, 6 litrgacha bo‘lishi, avtomobillar sotuvi hamda narxi bo‘yicha ma’lumotlarni kompaniyaning rasmiy kanallaridan yoki @uzavtosavdo_bot Telegram-boti orqali bilib olish mumkinligi qo‘shimcha qilingan.

Eslatib o‘tamiz, Chevrolet Onix avtomobilini yagona platformadagi ishlab chiqarish imkonini beradigan o‘rnatish va ishga tushirish ishlari 2021-yilning iyul—avgust oyida olib borildi.

Aprel oyida UzAuto Motors Chevrolet Onix’ni turli soha vakillari va blogerlar ishtirokida sinovdan o‘tkazgandi.