«Ўзавтосаноат» компанияси UzAuto Motors заводи базасида Chevrolet Onix ва Tracker автомобилларини ишлаб чиқаришни йўлга қўйиш учун 427,7 миллион доллар йўналтиришни режалаштирмоқда. Бу ҳақда Инвестициялар ва ташқи савдо вазирлиги томонидан «Ўзбекистон Республикасининг 2022–2024 йилларга мўлжалланган Инвестиция дастурини амалга ошириш чора-тадбирлари тўғрисида»ги Президент қарори лойиҳасида сўз боради.
Лойиҳа Асака шаҳридаги заводда 2022 йил сентябрида ишга тушиши ва унинг йиллик ишлаб чиқариш қуввати 190 минг автомобилни ташкил этиши кутилмоқда. Шунингдек, лойиҳага 2022 йилда яна 31 миллион доллар йўналтирилади.
Бундан ташқари, UzAuto Motors Powertrain заводида янги автомобиль моделлари учун ҳар йили 185 мингта двигатель ишлаб чиқаришни йўлга қўйиш режалаштирилмоқда. Ишлаб чиқаришни ташкил этиш учун 2020−2023 йилларда 190,8 миллион доллар ажратиш белгиланган.
Эслатиб ўтамиз, Chevrolet Onix автомобилини ягона платформадаги ишлаб чиқариш имконини берадиган ўрнатиш ва ишга тушириш ишлари 2021 йилнинг июль—август ойида олиб борилди. Сентябрь ўрталарида эса ижтимоий тармоқларда Onix автомобили 13 минг доллардан бошлаб сотувга чиққани айтилган хабарлар тарқалди. Бироқ UzAuto Motors ушбу хабарлар асоссиз эканлигини айтиб чиқди.
Маълумотларга кўра, Chevrolet Onix ва Tracker битта платформада йиғилади. Янги платформани жорий этиш дастури янги ишлаб чиқариш тизимига ўтишни, автомобиллар қисмларини маҳаллийлаштирилиш ва мослаштиришга имкон беради. UzAuto Motors’нинг Асака шаҳридаги заводида янги платформани жорий этиш дастурини амалга ошириш учун қўшимча тарзда яна 500 нафарга яқин хорижий мутахассис жалб қилинган.
Изоҳ (0)