O‘zbekistonda ikki fuqarolik uchun javobgarlik belgilanmoqda, deb xabar beradi IIV matbuot xizmati.
Ma’lum qilinishicha, Oliy Majlis Qonunchilik palatasining 24-avgustdagi yalpi majlisida deputatlar tomonidan “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonuni loyihasi ikkinchi va uchinchi o‘qishda bir ovozdan ma’qullangan.
O‘zbekiston Konstitutsiyasining 21-moddasiga muvofiq, respublikaning butun hududida yagona fuqarolik belgilangan.
“Biroq amaliyotda xorijda yashayotgan O'zbekiston fuqarolari tomonidan o'zlari bo'lib turgan davlatning fuqaroligini qabul qilish holatlari uchramoqda. Chunki ayrim davlatlarda ikkinchi fuqarolikka ega bo'lish qonun bilan taqiqlanmagan”, — deyiladi xabarda. Amaldagi qonunchilikda vakolatli organlarga O‘zbekiston fuqarolari tomonidan chet davlat fuqaroligini qabul qilish holatlarini aniqlash vazifasi yuklatilgan, ammo fuqarolarning ushbu fakt yuzasidan davlat organlariga xabar berish majburiyati mavjud emas edi. Ta’kidlanishicha, mazkur qonun amaliyotda O‘zbekiston fuqarolarini fuqarolikdan chiqmasdan, chet davlat fuqaroligini olishlari bilan bog‘liq bo‘lgan muammolarni bartaraf etishga qaratilgan.
Qonun loyihasida quyidagilar nazarda tutilgan:
- O‘zbekiston fuqaroligida bo‘lgan va chet davlat fuqaroligini olgan shaxslarni, chet davlat fuqaroligini qabul qilgan kundan boshlab 30 kalendar kuni ichida xabar berish tartibi joriy qilingan;
- Ma’muriy javobgarlik to‘g‘risidagi kodeksga ko‘ra, O‘zbekiston fuqarolari tomonidan chet davlat fuqaroligi olgani haqida belgilangan muddatda xabar bermaganlik uchun javobgarlik kiritilgan;
- O‘zbekiston fuqaroligi tugatilgan shaxs tomonidan O‘zbekiston fuqaroligi pasporti yoki identifikatsiya ID-kartalaridan foydalanganlik uchun ma’muriy javobgarlik belgilangan;
- davlat xizmatchilari yoki hokimiyat vakili vazifalarini bajaradigan yoki davlat organlarida tashkiliy-boshqaruv yoxud ma’muriy-xo‘jalik funksiyalarni bajaradigan O‘zbekiston fuqarolari tomonidan chet davlat fuqaroligi olgani haqida belgilangan muddatda xabar bermaganlik uchun javobgarlik belgilangan.
- O‘zbekiston fuqaroligi bilan bog‘liq masalalarni ko‘rib chiqishdagi huquqiy bo‘shliq bartaraf etiladi;
- chet davlat fuqaroligini qabul qilganligi haqida o‘z vaqtida xabar bermaganligi uchun javobgarlikni belgilash orqali O‘zbekiston fuqarolari, ayniqsa, davlat xizmatchilarining mas’uliyati oshiriladi;
- O‘zbekistonda ikki fuqarolik bilan bog‘liq yuzaga kelishi mumkin bo‘lgan salbiy oqibatlarning oldi olinadi;
- sohaga doir huquqni qo‘llash amaliyotining aniq va bir xilda bo‘lishi ta’minlanadi.
Izoh (0)