Navoiy viloyatida fuqaro kuyovini pichoqlab o‘ldirib qo‘ydi, deya xabar qilmoqda viloyat IIBB axborot xizmati.
Qayd etilishicha, fuqaro T.G. kuyovi A.K. bilan o‘rtalarida oldindan oilaviy kelishmovchilik bo‘lgan. Oqibatida T.G. qizi N.K.ni o‘z uyiga olib keladi, biroq uning to‘rt nafar farzandi kuyovining uyida qoladi. Fuqaro biroz muddatdan keyin nabiralarini o‘z uyiga olib kelmoqchi bo‘ladi.
Shu sababli fuqaro 2021-yilning 25-iyul kunidan 26-iyul kuniga o‘tar kechasi spirtli ichimlik iste’mol qilgan, mast holatda tungi soat 02:30 lar atrofida o‘ziga tegishli bo‘lgan Cobalt bilan kuyovi A.K.ning yashash xonadoniga borib, uning uxlab yotgan uyiga kirgan holda turli haqoratli so‘zlar bilan uni uyg‘otadi.
Shundan so‘ng qo‘lida bo‘lgan oshxona pichog‘i bilan tanasining turli joylariga bir necha marta urib hayot va sog‘lig‘i uchun xavfli bo‘lgan og‘ir tan jarohati yetkazib voqea joyidan ketadi.
Mazkur holat yuzasidan 2021-yil 26-iyulda Navoiy viloyat IIB huzuridagi TB tomonidan Jinoyat kodeksining 104-moddasi 3-qismi “d” bandi (jabrlanuvchining o‘lishiga sabab bo‘ladigan qasddan badanga og‘ir shikast yetkazish) bilan jinoyat ishi qo‘zg‘atilgan.
Tergov harakatlari davom etmoqda.
Bundan avval Andijonda maktab o‘quvchisi uch nafar tengdoshini pichoqlagani, Namanganda 19 yoshli yigit onasining norasmiy erini pichoqlab qo‘ygani hamda Andijonda aka o‘gay ukalarini chopib tashlagani haqida xabar berilgandi.
Izoh (0)