Korrupsiyaga qarshi kurashish Toshkent shahar Kengashi ta’sis etildi

27-sentabr kuni Toshkent shahar hokimligida Toshkent shahar Korrupsiyaga qarshi kurashish hududiy Kengashining ta’sis yig‘ilishi bo‘lib o‘tdi. Poytaxt hokimi Jahongir Ortiqxo‘jayev olib borgan yig‘ilishda shahar Korrupsiyaga qarshi kurashish bo‘yicha hududiy Kengashi a’zolari tasdiqlanib, ularning vazifalari to‘g‘risida so‘z yuritildi, deb xabar beradi hokimlik matbuot xizmati.

Tadbirda Korrupsiyaga qarshi kurashish agentligi direktori Akmal Burhonov, tashqi ishlar vaziri o‘rinbosari Erkin Hamroyev, Toshkent shahar hokimi Jahongir Ortiqxo‘jayev, Jurnalistlar ijodiy uyushmasi raisi Olimjon O‘sarov va boshqalar qatnashgan.

Korrupsiyaga qarshi kurashish agentligi matbuot xizmatining ma’lum qilishicha, kengash oldida turgan dolzarb vazifalar quyidagilardan iborat:

• Toshkent shahrida korrupsiyaga qarshi kurashish bo‘yicha faoliyatni amalga oshiruvchi va unda ishtirok etuvchi organlar va tashkilotlar faoliyati samaradorligini oshirishga qaratilgan qarorlar qabul qilish;
• Milliy kengashga qonun hujjatlarini va huquqni qo‘llash amaliyotini takomillashtirish yuzasidan takliflar kiritish;
• Korrupsiyaga qarshi kurashish bo‘yicha faoliyatni amalga oshiruvchi Toshkent shahridagi mahalliy davlat organlari rahbarlarining hisobotlari va ma’ruzalarini eshitish;
• Toshkent shahrida yoshlarda korrupsiyaga qarshi immunitetni mustahkamlash maqsadida maktablar, kasb-hunar kollejlari va oliy o‘quv yurtlarida korrupsiyaning oldini olish va unga qarshi kurashish fanlarining o‘tilishini tashkil etish, mavzuga oid turkum seminarlar tashkil etish;
• Toshkent shahrida oliy ta’lim, qurilish, sog‘liqni saqlash, davlat xaridlari yo‘nalishlarida “Korrupsiyasiz soha” loyihasini amalga oshirish va sohalar qamrovini kengaytirish.

Eslatib o‘tamiz, Shavkat Mirziyoyev 2020-yil 24-yanvarda Oliy Majlisga yo‘llagan murojaatnomada korrupsiyaning oqibatlari bilan kurashishdan ko‘ra barvaqt oldini olishga o‘tish kerakligini ta’kidlab, unga qarshi kurashishga mas’ul bo‘ladigan alohida organ tuzishni taklif qilgan edi. 2020-yilning 11-fevralida mazkur organni tashkil etish masalalari bo‘yicha Prezident raisligida yig‘ilish bo‘lib o‘tgandi. Shu yilning iyunida esa “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi farmonga muvofiq, Korrupsiyaga qarshi kurashish agentligi tashkil etilgan edi.