Andijon viloyati IIB ijtimoiy tarmoqlarda tarqalgan maktab o‘quvchisi uch nafar tengdoshiga pichoq bilan jarohat yetkazgani to‘g‘risidagi xabar yuzasidan rasmiy ma’lumot berdi.

Ijtimoiy tarmoqlarda Andijon shahridagi 2-sonli maktabning yuqori sinf o‘quvchilari o‘rtasida janjal sodir bo‘lgani to‘g‘risida xabarlar tarqaldi. Mazkur holat bo‘yicha Andijon shahar IIO FMB tomonidan o‘rganish ishlari olib borilgan.

Aniqlanishicha, shu kuni Respublika shoshilinch tibbiy yordam ilmiy markazi Andijon filialidan IIO FMBga uch nafar fuqaroga o‘tkir tig‘li predmetlardan olingan jarohatlar bilan murojaat qilgani to‘g‘risida xabar kelib tushgan.

Ma’lumotlarga ko‘ra, 22-sentabr kuni soat 13:20 da M. ismli yigit shahardagi 2-sonli maktab oldida 3 nafar tanishi bilan ko‘rishgan, shundan so‘ng gaplashib olish maqsadida kafe yoniga borgan.

U yerda o‘zaro kelishmovchilik sababli yigitlar o‘rtasida janjal yuzaga kelgan. Janjal vaqtida M. yonidagi yig‘ma pichoq bilan uch nafar tengdoshiga tan jarohati yetkazgan.“Ikki oshnam bilan hazillashayotganimda qolganlari kelib, sen bizni ham gapiryapsan, deb urishib ketdi”, — deydi yigit.

Mazkur holat yuzasidan Jinoyat kodeksining 277-moddasi (bezorilik) 3-qismi “g” bandi bilan jinoyat ishi qo‘zg‘atilib, tergov harakatlari olib borilmoqda.

Avvalroq Navoiyda spirtli ichimlik ta’sirida tanishini pichoqlab o‘ldirgan mashina ustasi 10 yilga qamalgani, samarqandlik yigit sevgan qizi, uning singlisi, opasi va onasini pichoqlagani, Toshkentda 14 yoshli bola u bilan salomlashmagan 22 yoshli yigitga pichoq bilan tan jarohati yetkazgani to‘g‘risida xabar berilgandi.