Ўзбекистонда икки фуқаролик учун жавобгарлик белгиланмоқда, деб хабар беради ИИВ матбуот хизмати.
Маълум қилинишича, Олий Мажлис Қонунчилик палатасининг 24 августдаги ялпи мажлисида депутатлар томонидан «Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонуни лойиҳаси иккинчи ва учинчи ўқишда бир овоздан маъқулланган.
Ўзбекистон Конституциясининг 21-моддасига мувофиқ, республиканинг бутун ҳудудида ягона фуқаролик белгиланган.
«Бироқ амалиётда хорижда яшаётган Ўзбекистон фуқаролари томонидан ўзлари бўлиб турган давлатнинг фуқаролигини қабул қилиш ҳолатлари учрамоқда. Чунки айрим давлатларда иккинчи фуқароликка эга бўлиш қонун билан тақиқланмаган», — дейилади хабарда. Амалдаги қонунчиликда ваколатли органларга Ўзбекистон фуқаролари томонидан чет давлат фуқаролигини қабул қилиш ҳолатларини аниқлаш вазифаси юклатилган, аммо фуқароларнинг ушбу факт юзасидан давлат органларига хабар бериш мажбурияти мавжуд эмас эди. Таъкидланишича, мазкур қонун амалиётда Ўзбекистон фуқароларини фуқароликдан чиқмасдан, чет давлат фуқаролигини олишлари билан боғлиқ бўлган муаммоларни бартараф этишга қаратилган.
Қонун лойиҳасида қуйидагилар назарда тутилган:
- Ўзбекистон фуқаролигида бўлган ва чет давлат фуқаролигини олган шахсларни, чет давлат фуқаролигини қабул қилган кундан бошлаб 30 календарь куни ичида хабар бериш тартиби жорий қилинган;
- Маъмурий жавобгарлик тўғрисидаги кодексга кўра, Ўзбекистон фуқаролари томонидан чет давлат фуқаролиги олгани ҳақида белгиланган муддатда хабар бермаганлик учун жавобгарлик киритилган;
- Ўзбекистон фуқаролиги тугатилган шахс томонидан Ўзбекистон фуқаролиги паспорти ёки идентификация ID-карталаридан фойдаланганлик учун маъмурий жавобгарлик белгиланган;
- давлат хизматчилари ёки ҳокимият вакили вазифаларини бажарадиган ёки давлат органларида ташкилий-бошқарув ёхуд маъмурий-хўжалик функцияларни бажарадиган Ўзбекистон фуқаролари томонидан чет давлат фуқаролиги олгани ҳақида белгиланган муддатда хабар бермаганлик учун жавобгарлик белгиланган.
- Ўзбекистон фуқаролиги билан боғлиқ масалаларни кўриб чиқишдаги ҳуқуқий бўшлиқ бартараф этилади;
- чет давлат фуқаролигини қабул қилганлиги ҳақида ўз вақтида хабар бермаганлиги учун жавобгарликни белгилаш орқали Ўзбекистон фуқаролари, айниқса, давлат хизматчиларининг масъулияти оширилади;
- Ўзбекистонда икки фуқаролик билан боғлиқ юзага келиши мумкин бўлган салбий оқибатларнинг олди олинади;
- соҳага доир ҳуқуқни қўллаш амалиётининг аниқ ва бир хилда бўлиши таъминланади.
Изоҳ (0)