Germaniyadagi parlament saylovlarida Sotsial-demokratik partiya (GSDP) 25,7 foiz ovoz bilan g‘olib bo‘lmoqda. Mamlakat Federal saylov komissiyasining barcha 299 ta okrugdagi ma’lumotlar hisoblab chiqilganidan keyin bergan dastlabki axboroti shundan darak bermoqda, deb yozadi “RBK”. Avvalroq ekzitpollar ham sotsial-demokratlarning g‘alabasini ko‘rsatgan edi.
Ikkinchi o‘rinda Xristian-demokratik ittifoq va Xristian-sotsial ittifoq (XDI/XSI) bormoqda, ularni saylovchilarning 24,1 foizi qo‘llab-quvvatladi. Deutsche Welle qayd etishicha, bu konservativ blok tarixida federal saylovlarda ko‘rsatilgan eng yomon natijadir.
“Yashillar” 14,8 foiz, Erkin demokratik partiya — 11,5 foiz, “Germaniya uchun alternativa” — 10,3 foiz ovoz to‘plagan.
“So‘llar” partiyasiga saylovchilarning 4,9 foizi ovoz berdi. U Berlin va Leypsigdagi saylov okruglarida uchta to‘g‘ridan to‘g‘ri mandatni qo‘lga kiritgani tufayli parlamentga o‘tadi.
2017-yilgi saylovlarga qiyoslaganda XDI/XSI natijasi 8,9 foizga pasaygan. GSDP 5,2 foizga ko‘proq, “Yashillar” esa 5,9 foizga ko‘proq ovoz to‘pladi. “Yashillar” 4,3 foiz, “Germaniya uchun alternativa” esa 2,3 foizga kamroq ovoz yig‘gan.
Germaniyada parlament saylovlari 16 yil ichida birinchi marta amaldagi kansler Angela Merkelsiz o‘tdi. U 2018-yildayoq Xristian-demokratik ittifoq rahbarligidan ketib, kansler lavozimidagi to‘rtinchi muddati yakunlangach, siyosatni tark etishini e’lon qilgan edi.
Saylovda ovoz berish yakunlangach, kansler lavozimiga asosiy da’vogarlar — GSDPdan Olaf Shols va XDI/XSIdan Armin Lashet Germaniyaning yangi hukumatini shakllantirishga tayyorligini bildirdi. Sholsning fikricha, uning partiyasi vazirlar mahkamasini tuzish uchun mandatga ega bo‘lgan. Lashet XDI/XSI bilan federal hukumat shakllantirish uchun bor imkoniyatni ishga solishga va’da berdi.
Lashet Germaniyada uchta siyosiy partiyadan iborat hukmron koalitsiya tuzilishi mumkinligini aytdi. Joriy hukmron koalitsiya tarkibiga XDI/XSI va GSDP kiradi.
Izoh (0)