“Toshshahartransxizmat” ijtimoiy tarmoqlarda tarqalgan avtobus haydovchisi yo‘lovchiga nisbatan qo‘pol muomalada bo‘lgani tasvirlangan video yuzasidan rasmiy ma’lumot berdi.
Ijtimoiy tarmoqlarda yo‘lovchi ayolning “oraliq bekatda ko‘p turib qolding” degan e’tiroziga javoban avtobus haydovchisi qo‘pollik qilib, unga avtobusdan tushishi buyurgan, aks holda “maydalab tashlash” bilan tahdid qilgani tasvirlangan video tarqaldi.
Ta’kidlanishicha, mazkur holat yuzasidan tezkor surishtiruv ishlari o‘tkazilgan bo‘lib, ushbu avtobus Toshkent shahrida yo‘lovchi tashish faoliyati bilan shug‘ullanuvchi “Avtosantrans-servis” MChJga biriktirilgan, davlat raqami 01/035 QBA bo‘lgan, 155-sonli yo‘nalishda harakatlanuvchi Isuzu rusumli avtobus haydovchisi O.Sh. ekani aniqlangan.
Holatga oydinlik kiritish maqsadida “Avtosantrans-servis” MChJ rahbariyati tomonidan yig‘ilish o‘tkazilib, haydovchining o‘z xizmat vazifasi davomida yo‘lovchini haqoratlagani, yo‘nalishda uyali aloqa vositasidan foydalangani va karantin qoidalariga amal qilmasdan tibbiy niqob taqmagani kabi qoidabuzarliklarni amalga oshirgani uchun vaqtincha haydovchilik vazifasidan chetlatildi. Bo‘lib o‘tgan holat tegishli tartibda tahlil qilinib, voqeaga aniqlik kiritilganidan so‘ng mazkur O.Sh.ning haydovchilikka loyiqlik masalasi ko‘rib chiqilishi belgilandi.
“Barcha haydovchilar bilan yo‘lovchilarni xavfsiz tashish va ularni o‘z manzillariga sog‘-omon yetkazib qo‘yish eng oliy maqsadimiz ekanligi, yo‘lovchilar bilan xushmuomalada bo‘lish, xizmat ko‘rsatish madaniyatini oshirish va karantin qoidalariga amal qilish yuzasidan yana bir bor tushuntirish ishlari olib borilib, haydovchilar ustidan nazorat kuchaytirildi”, — deyiladi xabarda.
“Toshshahartransxizmat” AJ yuqoridagi kabi holatlar kuzatilgan taqdirda 1062 ishonch raqamiga va info@tashbus.uz orqali murojaat qilish mumkinligini eslatib o‘tadi.
Avvalroq Toshkentda harakat vaqtida telefonda gaplashgan avtobus haydovchisi ishdan olingani to‘g‘risida xabar berilgandi.
Izoh (0)