«Тошшаҳартрансхизмат» ижтимоий тармоқларда тарқалган автобус ҳайдовчиси йўловчига нисбатан қўпол муомалада бўлгани тасвирланган видео юзасидан расмий маълумот берди.
Ижтимоий тармоқларда йўловчи аёлнинг «оралиқ бекатда кўп туриб қолдинг» деган эътирозига жавобан автобус ҳайдовчиси қўполлик қилиб, унга автобусдан тушиши буюрган, акс ҳолда «майдалаб ташлаш» билан таҳдид қилгани тасвирланган видео тарқалди.
Таъкидланишича, мазкур ҳолат юзасидан тезкор суриштирув ишлари ўтказилган бўлиб, ушбу автобус Тошкент шаҳрида йўловчи ташиш фаолияти билан шуғулланувчи «Автосантранс-сервис» МЧЖга бириктирилган, давлат рақами 01/035 QBА бўлган, 155-сонли йўналишда ҳаракатланувчи Isuzu русумли автобус ҳайдовчиси О.Ш. экани аниқланган.
Ҳолатга ойдинлик киритиш мақсадида «Автосантранс-сервис» МЧЖ раҳбарияти томонидан йиғилиш ўтказилиб, ҳайдовчининг ўз хизмат вазифаси давомида йўловчини ҳақоратлагани, йўналишда уяли алоқа воситасидан фойдалангани ва карантин қоидаларига амал қилмасдан тиббий ниқоб тақмагани каби қоидабузарликларни амалга оширгани учун вақтинча ҳайдовчилик вазифасидан четлатилди. Бўлиб ўтган ҳолат тегишли тартибда таҳлил қилиниб, воқеага аниқлик киритилганидан сўнг мазкур О.Ш.нинг ҳайдовчиликка лойиқлик масаласи кўриб чиқилиши белгиланди.
«Барча ҳайдовчилар билан йўловчиларни хавфсиз ташиш ва уларни ўз манзилларига соғ-омон етказиб қўйиш энг олий мақсадимиз эканлиги, йўловчилар билан хушмуомалада бўлиш, хизмат кўрсатиш маданиятини ошириш ва карантин қоидаларига амал қилиш юзасидан яна бир бор тушунтириш ишлари олиб борилиб, ҳайдовчилар устидан назорат кучайтирилди», — дейилади хабарда.
«Тошшаҳартрансхизмат» АЖ юқоридаги каби ҳолатлар кузатилган тақдирда 1062 ишонч рақамига ва info@tashbus.uz орқали мурожаат қилиш мумкинлигини эслатиб ўтади.
Аввалроқ Тошкентда ҳаракат вақтида телефонда гаплашган автобус ҳайдовчиси ишдан олингани тўғрисида хабар берилганди.
Изоҳ (0)