Vengriya O‘zbekistonning Samarqand, Toshkent va Buxoro kabi yirik shaharlariga aviaqatnovlarni yo‘lga qo‘yishni rejalashtirmoqda. Bu haqda bosh vazir o‘rinbosari Aziz Abduhakimov va Vengriya tashqi iqtisodiy aloqalar va tashqi ishlar vaziri Peter Siyarto bilan uchrashuvda ma’lum bo‘ldi.
Turizm va sport vazirligi matbuot xizmatining xabar berishicha, uchrashuvda sayyohlar almashinuvini qayta tiklash hamda O‘zbekiston va Vengriya o‘rtasida sayyohlar oqimini sezilarli darajada oshirish bo‘yicha aniq chora-tadbirlarni qabul qilish asosiy masalalaridan biri bo‘ldi. Shu munosabat bilan tomonlar Wizz Air aviakompaniyasi tomonidan Budapesht—Samarqand to‘g‘ridan to‘g‘ri reyslarini yo‘lga qo‘yish masalasini muhokama qildi.
Vengriya tashqi ishlar vaziri Budapeshtdan O‘zbekistonning Samarqand, Toshkent va Buxoro kabi yirik shaharlariga to‘g‘ridan to‘g‘ri reyslarni amalga oshirilishiga katta qiziqish bildirgan. Shu bilan birga, O‘zbekiston aeroportlarida xizmat ko‘rsatish shartlarini ta’minlashda va aviaqatnovlarga oid bitim imzolanishida ko‘makka umid bildirdi.
O‘zbekiston tomoni yaqin vaqt ichida Vengriya aviatashuvchisiga ushbu reysni ishga tushirish uchun eng qulay shart-sharoitlarni yaratish va uni har tomonlama qo‘llab-quvvatlashga tayyor ekanligini tasdiqladi.
AirlineRatings ma’lumotlariga ko‘ra, Wizz Air loukosteri 2021-yil uchun 10 ta eng xavfsiz va arzon aviakompaniyalar ro‘yxatidan o‘rin olgan.
Izoh (0)