Jazoirni 20 yil davomida boshqargan sobiq prezident Abdulaziz Buteflika vafot etdi, deya xabar bermoqda Meduza. U uzoq davom etgan kasallikdan keyin, 84 yoshida hayotdan ko‘z yumdi.
Jazoir hukumati sobiq prezidenting vafoti munosabati bilan mamlakatda uch kunlik motam e’lon qildi.
Buteflika 1999-yilda Jazoir prezidentiga aylangan va uzoq yillar mobaynida mamlakatda katta shuhrat qozongan. “Arab bahori” davrida prezident o‘tkazgan islohotlar natijasida mintaqadagi boshqa mamlakatlardan farqli o‘laroq, Jazoirda norozilik namoyishlari tezda to‘xtadi.
Buteflika o‘z lavozimini 2019-yilda keng miqyosli noroziliklar tufayli armiya bosimi ostida tark etdi. U yana bir marta prezident lavozimiga nomzodini qo‘yish niyatini e’lon qilganidan keyin noroziliklar boshlangan, vaholanki o‘sha paytga kelib u bir necha yildan buyon nogironlar aravachasida harakatlanar va omma oldiga chiqmas edi.
Buteflika prezident lavozimidan ketganidan keyin yangi hukumat uning atrofidagi odamlar ustidan bir nechta jinoyat ishlarini olib bordi. Xususan, Buteflikaning ukasi korrupsiya ishi bo‘yicha qamaldi, u akasi prezidentligining so‘nggi yillarida amalda mamlakatni boshqargan, deb hisoblanilgan.
“Arab bahori” — arab mamlakatlarida 2011-yil boshlarida yuz bergan norozilik namoyishlari va qo‘zg‘olonlar to‘lqini. Voqealarning dastlabki zamini 2010-yilda qayd etilgan. Tunis, Misr va Yamanda inqiloblar yuz bergan; Liviyada fuqarolar urushi hukumat o‘zgarishiga olib kelgan, Suriyada fuqarolar urushi haligacha davom etmoqda; Bahraynda fuqarolar qo‘zg‘oloni, Jazoir, Iroq, Iordaniya, Marokash va Ummonda ommaviy noroziliklar bo‘lib o‘tgan. Shuningdek, Kuvayt, Livan, Mavritaniya, Saudiya Arabistoni, Sudan, Jibuti va G‘arbiy Sahroyi Kabirda norozilik namoyishlari o‘tkazilgan. 2011-yil may oyida Isroil chegarasida yuz bergan to‘qnashuvlarni ham mahalliy “Arab bahori” ilhomlantirgan.
Izoh (0)