G‘arbiy Afrika davlatlari Gvineyada to‘ntarish uyushtirgan harbiylarni saylovlar o‘tkazishga chaqirdi

G‘arbiy Afrika davlatlari rahbarlari Gvineyada hokimiyatni qo‘lga olgan polkovnik Mamadi Dumbuya bilan uchrashib, uni kelasi olti oy ichida mamlakatda saylovlar o‘tkazishga chaqirdi.

Gana prezidenti Nana Akufo-Addo va Kot-d’Ivuar prezidenti Alassan Uattara G‘arbiy Afrika davlatlari iqtisodiy hamjamiyatining (ECOWAS) mintaqaviy sammitidan so‘ng Gvineya poytaxti Konakriga tashrif buyurdi. Sammitda Gvineyani kelgusi olti oy ichida saylov o‘tkazishga undash haqida qaror qabul qilingan.

Poytaxtda prezidentlar polkovnik Dumbuya bilan uchrashib, unga ECOWAS qarorini yetkazdi. Hozircha uchrashuv natijalari haqida ma’lumot yo‘q.

“Biz gaplashyapmiz”, — deb javob berdi Akufo-Addo, Dumbuya muddatidan oldin saylov o‘tkazishga rozi bo‘ldimi yoki yo‘q degan savolga.

Avvalroq ECOWAS Gvineyadagi harbiy to‘ntarishdan so‘ng mamlakatning tashkilotga a’zoligini to‘xtatgan edi. Shuningdek, Afrika Ittifoqi ham Gvineyaning ittifoqqa a’zoligini to‘xtatgan.

5-sentabr kuni Gvineya harbiylari mamlakatda to‘ntarish uyushtirib, prezident Alfa Kondeni qo‘lga oldi. Keyinroq harbiylar chegaralar yopilgani, hukumat va parlament tarqatilgani va konstitutsiyaga amal qilish to‘xtatilgani haqidagi bayonotlar bilan chiqdi.

Gvineya yangi hukumati 14-sentabr kuni mamlakatdagi siyosiy va diniy rahbarlar bilan o‘tish davri dasturini ishlab chiqish bo‘yicha muzokaralar boshladi.