Жазоирни 20 йил давомида бошқарган собиқ президент Абдулазиз Бутефлика вафот этди, дея хабар бермоқда Meduza. У узоқ давом этган касалликдан кейин, 84 ёшида ҳаётдан кўз юмди.
Жазоир ҳукумати собиқ президентинг вафоти муносабати билан мамлакатда уч кунлик мотам эълон қилди.
Бутефлика 1999 йилда Жазоир президентига айланган ва узоқ йиллар мобайнида мамлакатда катта шуҳрат қозонган. «Араб баҳори» даврида президент ўтказган ислоҳотлар натижасида минтақадаги бошқа мамлакатлардан фарқли ўлароқ, Жазоирда норозилик намойишлари тезда тўхтади.
Бутефлика ўз лавозимини 2019 йилда кенг миқёсли норозиликлар туфайли армия босими остида тарк этди. У яна бир марта президент лавозимига номзодини қўйиш ниятини эълон қилганидан кейин норозиликлар бошланган, ваҳоланки ўша пайтга келиб у бир неча йилдан буён ногиронлар аравачасида ҳаракатланар ва омма олдига чиқмас эди.
Бутефлика президент лавозимидан кетганидан кейин янги ҳукумат унинг атрофидаги одамлар устидан бир нечта жиноят ишларини олиб борди. Хусусан, Бутефликанинг укаси коррупция иши бўйича қамалди, у акаси президентлигининг сўнгги йилларида амалда мамлакатни бошқарган, деб ҳисобланилган.
«Араб баҳори» — араб мамлакатларида 2011 йил бошларида юз берган норозилик намойишлари ва қўзғолонлар тўлқини. Воқеаларнинг дастлабки замини 2010 йилда қайд этилган. Тунис, Миср ва Яманда инқилоблар юз берган; Ливияда фуқаролар уруши ҳукумат ўзгаришига олиб келган, Сурияда фуқаролар уруши ҳалигача давом этмоқда; Баҳрайнда фуқаролар қўзғолони, Жазоир, Ироқ, Иордания, Марокаш ва Уммонда оммавий норозиликлар бўлиб ўтган. Шунингдек, Кувайт, Ливан, Мавритания, Саудия Арабистони, Судан, Жибути ва Ғарбий Саҳройи Кабирда норозилик намойишлари ўтказилган. 2011 йил май ойида Исроил чегарасида юз берган тўқнашувларни ҳам маҳаллий «Араб баҳори» илҳомлантирган.
Изоҳ (0)