Surxondaryo viloyatining Sho‘rchi tumanida 160 tupdan ortiq tut daraxti qo‘porilib, o‘rnida qurilish boshlangani to‘g‘risida xabar berilgan edi. Holat yuzasidan “O‘zbekipaksanoat” uyushmasi munosabat bildirib, tutzordagi daraxtlar tuman hokimining noqonuniy qarori bilan kesilganini ma’lum qilgandi. Viloyat hokimligi matbuot xizmatining ma’lum qilishicha, ushbu holat Sho‘rchi tumani prokuraturasi tomonidan tegishli mutaxassislar ishtirokida o‘rganildi.
Aniqlanishicha, 13-sentabrdan 14-sentabrga o‘tar kechasi fuqaro O.X. tomonidan tuman “Agro pilla” MChJga qarashli tut plantatsiyasidagi 40 tup tut daraxti noqonuniy tarzda kesib tashlangani oqibatida jamiyat manfaatlariga 31 million 200 ming so‘m miqdorida zarar yetkazilgan.
Mazkur holat yuzasidan 15-sentabr kuni tuman prokuraturasi tomonidan O.X.ga nisbatan Ma’muriy javobgarlik to‘g‘risidagi kodeksning 79-moddasi (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) bilan ma’muriy javobgarlik to‘g‘risida ish qo‘zg‘atilib, BHMning besh baravari (1 million 350 ming so‘m) miqdorida jarima jazosi qo‘llanilgan.
Bundan tashqari, tuman hokimining tut plantatsiyasidan bino qurilishi uchun yer ajratish haqidagi 8-apreldagi qarori qonun hujjatlariga zid ravishda qabul qilingani aniqlanib, uni bekor qilib, qonunga muvofiqlashtirish haqida prokuror protesti keltirilgan.
Shuningdek, jamiyat tomonidan iqtisodiy zararni undirish masalasida fuqarolik ishlari bo‘yicha Denov tumanlararo sudiga da’vo arizasi kiritilgan. Bu borada prokuror nazorati o‘rnatilgan.
Shavkat Mirziyoyevning 3-fevraldagi farmoni bilan O‘zbekistonda daraxt va butalarni kesishga o‘rnatilgan moratoriy muddati 2021-yil oxirigacha uzaytirilgandi. Surxondaryo viloyati Ekologiya va atrof-muhitni muhofaza qilish boshqarmasining izoh berishicha, Prezident farmoniga muvofiq joriy etilgan moratoriy tut plantatsiyalariga tatbiq etilmaydi.
Avvalroq Toshkent viloyatining Bo‘stonliq tumanida “Amirsoy” kurort zonasida 700 tup atrofida qimmatbaho daraxtlar kesib tashlangani haqida xabar berilgan edi. Holat yuzasidan jinoyat ishi qo‘zg‘atilgan.
Izoh (0)