Сурхондарё вилоятининг Шўрчи туманида 160 тупдан ортиқ тут дарахти қўпорилиб, ўрнида қурилиш бошлангани тўғрисида хабар берилган эди. Ҳолат юзасидан «Ўзбекипаксаноат» уюшмаси муносабат билдириб, тутзордаги дарахтлар туман ҳокимининг ноқонуний қарори билан кесилганини маълум қилганди. Вилоят ҳокимлиги матбуот хизматининг маълум қилишича, ушбу ҳолат Шўрчи тумани прокуратураси томонидан тегишли мутахассислар иштирокида ўрганилди.
Аниқланишича, 13 сентябрдан 14 сентябрга ўтар кечаси фуқаро О.Х. томонидан туман «Агро пилла» МЧЖга қарашли тут плантациясидаги 40 туп тут дарахти ноқонуний тарзда кесиб ташлангани оқибатида жамият манфаатларига 31 миллион 200 минг сўм миқдорида зарар етказилган.
Мазкур ҳолат юзасидан 15 сентябрь куни туман прокуратураси томонидан О.Х.га нисбатан Маъмурий жавобгарлик тўғрисидаги кодекснинг 79-моддаси (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) билан маъмурий жавобгарлик тўғрисида иш қўзғатилиб, БҲМнинг беш баравари (1 миллион 350 минг сўм) миқдорида жарима жазоси қўлланилган.
Бундан ташқари, туман ҳокимининг тут плантациясидан бино қурилиши учун ер ажратиш ҳақидаги 8 апрелдаги қарори қонун ҳужжатларига зид равишда қабул қилингани аниқланиб, уни бекор қилиб, қонунга мувофиқлаштириш ҳақида прокурор протести келтирилган.
Шунингдек, жамият томонидан иқтисодий зарарни ундириш масаласида фуқаролик ишлари бўйича Денов туманлараро судига даъво аризаси киритилган. Бу борада прокурор назорати ўрнатилган.
Шавкат Мирзиёевнинг 3 февралдаги фармони билан Ўзбекистонда дарахт ва буталарни кесишга ўрнатилган мораторий муддати 2021 йил охиригача узайтирилганди. Сурхондарё вилояти Экология ва атроф-муҳитни муҳофаза қилиш бошқармасининг изоҳ беришича, Президент фармонига мувофиқ жорий этилган мораторий тут плантацияларига татбиқ этилмайди.
Аввалроқ Тошкент вилоятининг Бўстонлиқ туманида «Амирсой» курорт зонасида 700 туп атрофида қимматбаҳо дарахтлар кесиб ташлангани ҳақида хабар берилган эди. Ҳолат юзасидан жиноят иши қўзғатилган.
Изоҳ (0)