Shanxay hamkorlik tashkilotining 17-sentabr kuni Dushanbedagi sammitida ushbu nufuzli tashkilotga 2021—2022-yillarda raislik qilish O‘zbekistonga o‘tishi to‘g‘risida qaror qabul qilindi. Bu haqda Prezident matbuot kotibi Sherzod Asadov ma’lum qildi.
- ShHTning nufuzi va salohiyatini yanada oshirish;
- ichki mintaqaviy savdoni rivojlantirish dasturini ishlab chiqish;
- sanoat kooperatsiyasi dasturini qabul qilish va bu borada hamkorlikni nazarda tutuvchi markazlarni tuzish;
- ShHTning Transport bog‘liqligi strategiyasini qabul qilish;
- ShHT makonida infratuzilmani rivojlantirish dasturini ishlab chiqish;
- kambag‘allikni kamaytirish va oziq-ovqat xavfsizligi sohalaridagi hamkorlikni kuchaytirish;
- ShHTning xalqaro axborot xavfsizligi bo‘yicha ekspertlar forumini ta’sis qilish;
- ShHTning Ezgu niyat elchisi institutini joriy qilish;
- turizm sohasida hukumatlararo bitimni ishlab chiqish;
- yuqumli kasalliklarga qarshi kurashishni nazarda tutuvchi “yo‘l xaritasi”ni qabul qilish.
“O‘zbekiston raisligi davrida davlatimiz rahbari tomonidan belgilab berilgan ustuvor vazifalarni amalga oshirish maqsadida hamkorlarimiz bilan birgalikda 80 dan ortiq tadbir o‘tkazish rejalashtirilgan”, — deyiladi Prezident matbuot kotibi xabarida.
Eslatib o‘tamiz, Shavkat Mirziyoyev Shanxay hamkorlik tashkiloti Davlat rahbarlari kengashining majlisida ishtirok etish uchun 16-sentabr kuni Tojikiston poytaxti Dushanbega keldi. Shu kuni davlat rahbari Tojikiston prezidenti Emomali Rahmon, Eron prezidenti Ibrohim Raisiy bilan uchrashuv o‘tkazdi. Shuningdek, Pokiston bosh vaziri Imron Xon bilan muzokara o‘tkazdi.
Izoh (0)