Shavkat Mirziyoyev Shanxay hamkorlik tashkiloti Davlat rahbarlari kengashining majlisida ishtirok etish uchun 16-sentabr kuni Tojikiston poytaxti Dushanbega jo‘nab ketgandi. Prezident matbuot xizmatining xabar berishicha, davlat rahbarini Tojikiston bosh vaziri Qohir Rasulzoda va boshqa rasmiy shaxslar kutib oldi.
Qayd etilishicha, Prezident shu kunning o‘zida Tojikiston va Eron prezidentlari hamda Pokiston bosh vaziri bilan uchrashuvlar o‘tkazadi.
ShHT sammiti 17-sentabr kuni bo‘lib o‘tadi. O‘zbekiston bu tashkilotning asoschi davlatlaridan biri. 2001-yilda tuzilgan mazkur tashkilotga bugungi kunda sakkizta mamlakat – Hindiston, Qozog‘iston, Xitoy, Qirg‘iziston, Pokiston, Rossiya, Tojikiston va O‘zbekiston a’zo.
Sammit yakunida Dushanbe deklaratsiyasi qabul qilinishi va boshqa hujjatlar imzolanishi ko‘zda tutilgan. Shuningdek, anjuman doirasida “ShHT — KXSHT” formatidagi uchrashuv o‘tkazilishi ham rejalashtirilgan. Yig‘ilish yakunida ShHTga raislik Tojikistondan O‘zbekistonga o‘tadi.
