Uzbekistan Airways oradan 6 yil o‘tib, Toshkent va Kiyev o‘rtasida aviaqatnovlarni tiklamoqda

Uzbekistan Airways 26-sentabrdan boshlab Toshkent—Kiyev—Toshkent yo‘nalishi bo‘yicha aviaqatnovlarni tiklaydi.

Kompaniya matbuot xizmatining xabar berishicha, rejaga muvofiq qatnov haftada bir marta —  yakshanba kunlari amalga oshiriladi.

Chiptalar narxi Toshkent—Kiyev yo‘nalishida 2 234 655 so‘mdan (bagajsiz) va 2 575 535 so‘mdan (bagajni hisobga olgan holda), Toshkent—Kiyev—Toshkent yo‘nalishida esa 4 205 223 so‘mdan (bagajsiz) va 4 836 482 so‘mdan (bagajni hisobga olgan holda) boshlanadi.

Ushbu narxlar 16-sentabr holatiga ko‘ra ko‘rsatilgan.

Eslatib o‘tamiz, Uzbekistan Airways Toshkent—Kiyev—Toshkent yo‘nalishida parvozlarni amalga oshirishni 2015-yilning may oyida to‘xtatgandi.

Avvalroq Ukrainaning Bees Airline loukosteri Kiyevdan Samarqandga qatnay boshlagani haqida xabar berilgan edi.