Toshkentda 17-sentabr kuni “Hizb ut-Tahrir”ga a’zo yana 12 kishi qo‘lga olindi. Bu haqda poytaxt IIBB matbuot xizmati xabar berdi.
Qayd etilishicha, huquqni muhofaza qiluvchi idoralar tomonidan Olmazor, Uchtepa, Yashnobod va Yunusobod tumanlarida istiqomat qiluvchi ushbu fuqarolarning jinoiy faoliyatiga chek qo‘yishga qaratilgan tezkor tadbirlar o‘tkazilib, gumonlanuvchilar ushlandi va qamoqqa olindi.
Ushlangan “tahrirchilar”ning barchasi Yunusobod tumanida istiqomat qiluvchi 1980-yilda tug‘ilgan R.U.ning g‘oyaviy ta’siri ostida ekstremistik faoliyat bilan shug‘ullanib kelgan.
R.U. va uning jinoiy aloqalari internet orqali Ukrainada yashirinib kelayotgan 1980-yilda Qirg‘izistonda tug‘ilgan, Mahmud Abdulmo‘min taxallusli Mahmudjon Xoldarov bilan aloqa o‘rnatib, uning ma’ruzalari va “Hizb-ut Tahrir” ekstremistik tashkiloti materiallarini aholi orasida tarqatish hamda uning ko‘rsatmalari asosida “tahrirchilar” safiga yangi a’zolarni yollash bilan shug‘ullanib kelgan.
Shuningdek, ular O‘zbekistonda xalifalik davlatini qurish to‘g‘risidagi g‘oyalarni doimiy ravishda targ‘ib qilgan.
Mazkur shaxslarning yashash manzillarida va uyali aloqa vositalarida “Hizb-ut Tahrir” diniy ekstremistik tashkilotining adabiyotlari va materiallari mavjudligi aniqlanib, protsessual tartibda rasmiylashtirib olingan.
Qayd etilishicha, hozirda ularning noqonuniy xatti-harakatlariga huquqiy baho berish va javobgarlikka tortish maqsadida tergov-surishtiruv tadbirlari davom ettirilmoqda.
Eslatib o‘tamiz, 10-sentabr kuni Toshkentda va Toshkent viloyatida “Hizb ut-Tahrir”ga a’zo 29 nafar ayol qo‘lga olingani haqida xabar berilgan edi. 15-sentabr kuni ushbu diniy ekstremistik tashkiloti a’zolarining yana 10 nafari qo‘lga olindi. Ularning barchasi muqaddam mazkur tashkilot safida sodir etgan jinoyati uchun jazo muddatini o‘tab chiqqan shaxslar bo‘lgan.
Izoh (0)