Yagona umumrespublika protsessing markazi (Uzcard) internet va ijtimoiy tarmoqlarda kompaniya brendidan foydalanib firibgarlik holatlari ortgani haqida ogohlantirdi. Qayd etilishicha, firibgarlar mavjud bo‘lmagan loyihalar doirasida pul mukofotlarini to‘lashni va’da qilib, odamlarni aldamoqda.
“Yodingizda bo‘lsin, agar siz o‘zingiz qilmagan harakatlar to‘g‘risida SMS xabar olgan bo‘lsangiz, bank kartasi tafsilotlarini, SMS orqali qabul qilingan bir martalik parollarni yoki bank yoki to‘lov tizimi nomidan boshqa shubhali murojaatlar haqida ma’lumot so‘rovi kelsa, bilingki, siz bilan yomon niyatli kimsalar bog‘langan.
Aslida esa sizdan olingan ma’lumotlar ularga hisobingizni masofadan boshqarishga, shuningdek, mablag‘larni boshqa hisoblarga qiyinchiliksiz o‘tkazishni amalga oshirish imkonini beradi”, — deyiladi kompaniya xabarida.
Uzcard, shuningdek, tasdiqlanmagan saytlarga parollar va shaxsiy ma’lumotlarni kiritishda hushyor bo‘lishga, shaxsiy ma’lumotlarga uchinchi shaxslarning kirishiga yo‘l qo‘ymaslikka chaqirdi.
“Shuni unutmang, har qanday muammoni hal qilishdan ko‘ra, uning oldini olish osonroqdir. Noqulay vaziyatlarga tushib qolmaslik va karta hisoblaridagi pullaringiz xavfsizligini ta’minlash uchun sizdan imkon qadar hushyor bo‘lishingizni so‘raymiz.
Agar sizga nisbatan jinoyat sodir etilgan bo‘lsa, zudlik bilan xizmat ko‘rsatuvchi bank bilan bog‘laning, shuningdek, huquqni muhofaza qilish organlariga xabar bering”, — deyiladi kompaniya xabarida.
Bundan bir necha yil avval firibgarlar plastik kartalar haqidagi ma’lumotlarni yig‘ish maqsadida Uzcard saytining klonini yaratgandi.
Izoh (0)