Toshkent viloyatining Bo‘stonliq tumanida “Amirsoy” kurort zonasida 700 tup atrofida qimmatbaho daraxtlar kesib tashlangani haqida xabar berilgan edi. Bosh prokuratura axborot xizmati rahbari Hayot Shamsutdinov holat yuzasidan jinoyat ishi qo‘zg‘atilganini ma’lum qildi.
“Amirsoy” kurort zonasida daraxtlar kesib tashlanganini Oliy Majlis Qonunchilik palatasi deputati Rasul Kusherbayev tanqid qilib chiqqandi. Uning aytishicha, kurort zonasi ma’muriyati tomonidan 700 tup daraxt kesib tashlanishi oqibatida tabiatga salkam 400 million so‘mlik zarar yetkazilgan.
“Shuncha gapdan keyin ham har xil bahonalar bilan daraxtkesarlik davom etmoqda. Buncha katta ‘dux’ qayerdan paydo bo‘ldi? Holat bo‘yicha Ekologiya qo‘mitasi tomonidan prokuraturaga taqdim etilgan materiallar imi-jimida yopilib ketmasligi kerak”, — degan edi deputat.
Bosh prokuratura ma’lumotiga ko‘ra, holat yuzasidan Jinoyat kodeksining 198-moddasi (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) bilan jinoyat ishi qo‘zg‘atildi.
Eslatib o‘tamiz, Shavkat Mirziyoyevning 3-fevraldagi farmoni bilan O‘zbekistonda daraxt va butalarni kesishga o‘rnatilgan moratoriy muddati 2021-yil oxirigacha uzaytirilgan. Shuningdek, daraxtlarni noqonuniy kesganlik uchun jarima miqdori ikki baravarga oshirilgan.
Izoh (0)