Тошкент вилоятининг Бўстонлиқ туманида «Амирсой» курорт зонасида 700 туп атрофида қимматбаҳо дарахтлар кесиб ташлангани ҳақида хабар берилган эди. Бош прокуратура ахборот хизмати раҳбари Ҳаёт Шамсутдинов ҳолат юзасидан жиноят иши қўзғатилганини маълум қилди.
«Амирсой» курорт зонасида дарахтлар кесиб ташланганини Олий Мажлис Қонунчилик палатаси депутати Расул Кушербаев танқид қилиб чиққанди. Унинг айтишича, курорт зонаси маъмурияти томонидан 700 туп дарахт кесиб ташланиши оқибатида табиатга салкам 400 миллион сўмлик зарар етказилган.
«Шунча гапдан кейин ҳам ҳар хил баҳоналар билан дарахткесарлик давом этмоқда. Бунча катта ‘дух’ қаердан пайдо бўлди? Ҳолат бўйича Экология қўмитаси томонидан прокуратурага тақдим этилган материаллар ими-жимида ёпилиб кетмаслиги керак», — деган эди депутат.
Бош прокуратура маълумотига кўра, ҳолат юзасидан Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилди.
Эслатиб ўтамиз, Шавкат Мирзиёевнинг 3 февралдаги фармони билан Ўзбекистонда дарахт ва буталарни кесишга ўрнатилган мораторий муддати 2021 йил охиригача узайтирилган. Шунингдек, дарахтларни ноқонуний кесганлик учун жарима миқдори икки бараварга оширилган.
Изоҳ (0)