Andijondagi maktablarda koreys tilini o‘qitishga ixtisoslashtirilgan maxsus sinflar tashkil etildi

Andijon shahridagi 13- va 24-umumta’lim maktablarida koreys tilini o‘qitishga ixtisoslashtirilgan maxsus sinflar tashkil etildi. Bu haqda “Daryo” muxbiri xabar bermoqda.

Viloyat xalq ta’limi boshqarmasi axborot xizmatining qo‘shimcha qilishicha, yangi o‘quv yilidan boshlab xalq ta’limi boshqarmasi hamda O‘zbekiston—Koreya universiteti o‘rtasida tuzilgan hamkorlik memorandumiga asosan Andijon shahridagi 13- va 24-umumta’lim maktablarida maxsus sinflar tashkil etilib, Koreyaning yetuk professorlari tajriba tariqasida dars berishni boshlagan.

Ochilish marosimida ishtirok etgan universitet rektori Pak Jun Xo viloyat xalq ta’limi boshqarmasi bilan hamkorlikda o‘tkazilgan fan olimpiadalari davomida andijonlik yoshlarning bilim salohiyati yuqori ekanligi aniqlanganini qayd etgan.

Qo‘shimcha qilinishicha, kelgusida O‘zbekiston Prezidentining 2021-yil 19-maydagi “O‘zbekiston Respublikasida xorijiy tillarni o‘rganishni ommalashtirish faoliyatini sifat jihatdan yangi bosqichga olib chiqish chora-tadbirlari to‘g‘risida”gi qarori ijrosini ta’minlash maqsadida Andijon shahrida barcha moddiy-texnik baza bilan ta’minlangan, koreys tilini o‘qitishga ixtisoslashtirilgan maktab tashkil etish rejalashtirilgan.