Prezident 13-sentabr kuni “O‘zbekiston Respublikasi aholisi va hududining seysmik xavfsizligini ta’minlash to‘g‘risida”gi qonunni imzoladi. Bu haqda Adliya vazirligi matbuot xizmati xabar berdi.
Qonunga ko‘ra, seysmik xavfsizligi ta’minlanadigan obyektlar ahamiyatiga ko‘ra quyidagi toifalarga bo‘linadi:
- I toifa – xavflilik omili past bo‘lgan obyektlar;
- II toifa – xavflilik omili o‘rtacha bo‘lgan obyektlar;
- III toifa – xavflilik omili yuqori bo‘lgan obyektlar;
- IV toifa – xavflilik omili juda yuqori bo‘lgan obyektlar.
Seysmik faol zonalarda joylashgan, qurilish normalari va qoidalariga muvofiq loyihalashtirilgan hamda qurilgan II–IV toifadagi obyektlar har 5 yilda zilzilabardoshlikka doir vizual tekshiruvdan o‘tkaziladi.
Seysmik faol zonalarda joylashgan III–IV toifadagi obyektlar har 10 yilda zilzilabardoshlikka doir instrumental-texnik tekshiruvdan o‘tkazilishi lozim. Seysmik faol zonalarda yangi qurilgan III–IV toifadagi obyektlar ishga tushirilayotganda zilzilabardoshlikka doir instrumental-texnik tekshiruvdan majburiy tartibda o‘tkaziladi. IV toifadagi obyektlarga taalluqli suv omborlari to‘g‘onlarida va gidroelektrostansiyalarda instrumental-texnik tekshiruvlar bir yilda ikki marta o‘tkaziladi.
Suv omborlari to‘g‘onlarining instrumental-texnik tekshiruvlari seysmik faol hududlarda sodir bo‘lgan har bir kuchli zilziladan keyin majburiy tartibda o‘tkaziladi.
Qonunga ko‘ra, kuchli zilzilalar natijasida yetkazilgan zararni baholashga doir ishlar Vazirlar Mahkamasi tomonidan amalga oshiriladi.
Eslatib o‘tamiz, 31-avgust kuni parlament yuqori palatasining 17-yalpi majlisida senatorlar bugungi kunda seysmik xavfsizlikni ta’minlash sohasidagi munosabatlar 20 ga yaqin qonunosti hujjatlar bilan tarqoq holda tartibga solinishi va mazkur yo‘nalishda amalga oshirilishi lozim bo‘lgan barcha tadbirlar qonunchilikda nazarda tutilmaganini qayd etgandi.
Shu sababli, mamlakat aholisi va hududining seysmik xavfsizligini ta’minlashning qonuniy asoslarini takomillashtirish, mas’ul davlat organlarining bu boradagi vakolatlarini belgilash hamda kuchli zilzilalarga tayyorgarlik ko‘rish, ularning oqibatlarini bartaraf etishning aniq mexanizmlarini ishlab chiqish zarurligi aytilgandi.
Endilikda, yangi qabul qilingan qonun respublika aholisi va hududining seysmik xavfsizligini ta’minlash sohasidagi munosabatlarni tartibga solish hamda amaldagi qonunchilikdagi bo‘shliqlarni bartaraf etishga, shu bilan birga, seysmik mustahkam bino va inshootlarni qurilishi sifati nazoratga olinishiga xizmat qiladi.
Ushbu qonun rasmiy e’lon qilingan kundan e’tiboran 6 oy o‘tgach kuchga kiradi.
Izoh (0)