O‘zbekiston Bobur nomidagi O‘sh drama teatri rekonstruksiyasiga 5 mln dollar ajratadi

O‘zbekiston Qirg‘izistondagi O‘sh musiqali akademik drama teatrini rekonstruksiya qilishga 5 million dollar ajratadi. Bu haqda O‘sh hokimligi matbuot xizmati xabar berdi.

Qayd etilishicha, 13-sentabr kuni ushbu teatrni to‘liq rekonstruksiya qilish ishlari boshlandi. Shahar hokimi o‘rinbosari Jasur Azimov boshchiligidagi davlat organlari xodimlari va tegishli mutasaddilardan iborat komissiya ish boshlanishi jarayoni bilan tanishdi.

Teatr rekonstruksiyasi ikki tomonlama ijtimoiy-madaniy aloqalarni mustahkamlash bo‘yicha O‘zbekiston va Qirg‘iziston hukumatlari erishgan kelishuv asosida boshlangan.

Rekonstruksiya ishlarini 2022-yilning boshiga yakunlash rejalashtirilgan. Taqdim qilingan loyihaga ko‘ra, teatr binosi to‘liq yangilanadi.