7-sentabr kuni Innovatsion rivojlanish vazirligida davlat idoralari va tashkilotlari vakillari, tibbiyot muassasalari rahbarlari va xodimlari, xalqaro mutaxassislar hamda JSST ekspertlari ishtirokida “COVID-19. Vaksinatsiya — erishilgan yutuqlar, istiqboldagi reja va maqsadlar” mavzusidagi ilmiy-amaliy xalqaro konferensiya o‘tkazilgandi. Unda alohida ma’ruza bilan ishtirok etgan Sanitariya-epidemiologik osoyishtalik va jamoat salomatligi xizmati boshlig‘ining o‘rinbosari, tibbiyot fanlari doktori, professor Nurmat Otabekov tadbirdagi chiqishida tilga olingan fikrlarni SSV matbuot xizmatiga so‘zlab berdi.
Nurmat Otabekovning ta’kidlashicha, koronavirusga qarshi emlash boshlangandan beri o‘tgan 5 oy davomida 285 ta holatda shifoxonaga yotqizilganlar mazkur kasallikka qarshi emlangani epidemiologik surishtiruv jarayonida aniqlangan.
Mutaxassisning aytishicha, hozirda Sanitariya-epidemiologik osoyishtalik va jamoat salomatligi xizmati tomonidan grant loyihasi amalga oshirilayotgan bo‘lib, unga muvofiq SARS-COV-2 koronavirusiga chalingan va ushbu kasallikka qarshi vaksina olgan odamlar orasida immunitet darajasini o‘rganish ishlari olib borilmoqda.
Uning so‘zlariga ko‘ra, mutaxassislar tomonidan bir vaqtning o‘zida COVID-19 ga qarshi ZF-UZ-VAC2001, AstraZeneca hamda “Sputnik V” vaksinalari bilan emlangan shaxslar tadqiq qilinmoqda.
Tadqiqot davrida aniqlanishicha, 2021-yilning 1-aprelidan avgust oyining yakuniga qadar Toshkent viloyatining Zangiota 1-va 2-sonli klinikalariga 37 890 nafar koronavirus va pnevmoniyaga chalingan va ularga gumon qilingan bemor yotqizilgan bo‘lib, ushbu bemorlarning 285 tasi (0,75 foiz) bir yoki bir necha marotaba vaksina olgan. Tadqiqotlar vaksina qabul qilganidan keyin koronavirus bilan kasallangan bemorlarda kasallik, asosan, yengil va o‘rta og‘irlikda kechganini ko‘rsatdi.
Bu holatni quyidagi tahlillardan ham ko‘rish mumkin: bemorlarning 231 nafarida (Zangiota 1- va 2- klinikalarida davolangan umumiy bemorlar soniga nisbatan 0.6 foiz) kasallik yengil darajada kechgan. Kasallanganlarning juda kam qismi kasallikni o‘rta va og‘ir darajada o‘tkazgan.
Bemorlarning 10 nafarida klinik belgilar kuzatilmagan va ahvoli qoniqarli bo‘lsa-da, kasallik aniqlangan shaxslarning xohish-istaklari va emlashdan keyin kasallandim, degan xavotirlarini inobatga olib, kuzatuv maqsadida bir necha kunga shifoxonaga yotqizilgan.
Nurmat Otabekovning so‘zlariga ko‘ra, olib borilayotgan ilmiy tadqiqotlar hali davom etayotgan bo‘lsa-da, izlanishlar natijalariga muvofiq birlamchi xulosalarni qilish mumkin:
- tekshirilgan bemorlarda, qabul qilingan vaksinalar turidan qat’i nazar, antitanalarning yetarli miqdori ishlab chiqarilgan;
- vaksinalarning ikkinchi dozasini qabul qilish antitanalar miqdorining sezilarli darajada o‘sishiga olib kelgan;
- ZF-UZ-VAC2001 vaksinasini qabul qilgan shaxslar guruhining natijalari boshqa turdagi vaksinalarni qabul qilgan shaxslarning natijalariga to‘la mos keladi;
- ZF-UZ-VAC2001 aholini COVID-19ga qarshi emlash uchun samarali va ishonchli vaksina hisoblanadi;
- COVID-19 ga qarshi emlash kasallikning osoyishta kechishi va og‘ir holatlar sonining keskin kamayishiga imkon yaratadi.
Izoh (0)