7 сентябрь куни Инновацион ривожланиш вазирлигида давлат идоралари ва ташкилотлари вакиллари, тиббиёт муассасалари раҳбарлари ва ходимлари, халқаро мутахассислар ҳамда ЖССТ экспертлари иштирокида «COVID-19. Вакцинация — эришилган ютуқлар, истиқболдаги режа ва мақсадлар» мавзусидаги илмий-амалий халқаро конференция ўтказилганди. Унда алоҳида маъруза билан иштирок этган Санитария-эпидемиологик осойишталик ва жамоат саломатлиги хизмати бошлиғининг ўринбосари, тиббиёт фанлари доктори, профессор Нурмат Отабеков тадбирдаги чиқишида тилга олинган фикрларни ССВ матбуот хизматига сўзлаб берди.
Нурмат Отабековнинг таъкидлашича, коронавирусга қарши эмлаш бошлангандан бери ўтган 5 ой давомида 285 та ҳолатда шифохонага ётқизилганлар мазкур касалликка қарши эмлангани эпидемиологик суриштирув жараёнида аниқланган.
Мутахассиснинг айтишича, ҳозирда Санитария-эпидемиологик осойишталик ва жамоат саломатлиги хизмати томонидан грант лойиҳаси амалга оширилаётган бўлиб, унга мувофиқ SARS-COV-2 коронавирусига чалинган ва ушбу касалликка қарши вакцина олган одамлар орасида иммунитет даражасини ўрганиш ишлари олиб борилмоқда.
Унинг сўзларига кўра, мутахассислар томонидан бир вақтнинг ўзида COVID-19 га қарши ZF-UZ-VAC2001, AstraZeneca ҳамда «Спутник V» вакциналари билан эмланган шахслар тадқиқ қилинмоқда.
Тадқиқот даврида аниқланишича, 2021 йилнинг 1 апрелидан август ойининг якунига қадар Тошкент вилоятининг Зангиота 1-ва 2-сонли клиникаларига 37 890 нафар коронавирус ва пневмонияга чалинган ва уларга гумон қилинган бемор ётқизилган бўлиб, ушбу беморларнинг 285 таси (0,75 фоиз) бир ёки бир неча маротаба вакцина олган. Тадқиқотлар вакцина қабул қилганидан кейин коронавирус билан касалланган беморларда касаллик, асосан, енгил ва ўрта оғирликда кечганини кўрсатди.
Бу ҳолатни қуйидаги таҳлиллардан ҳам кўриш мумкин: беморларнинг 231 нафарида (Зангиота 1- ва 2- клиникаларида даволанган умумий беморлар сонига нисбатан 0.6 фоиз) касаллик енгил даражада кечган. Касалланганларнинг жуда кам қисми касалликни ўрта ва оғир даражада ўтказган.
Беморларнинг 10 нафарида клиник белгилар кузатилмаган ва аҳволи қониқарли бўлса-да, касаллик аниқланган шахсларнинг хоҳиш-истаклари ва эмлашдан кейин касалландим, деган хавотирларини инобатга олиб, кузатув мақсадида бир неча кунга шифохонага ётқизилган.
Нурмат Отабековнинг сўзларига кўра, олиб борилаётган илмий тадқиқотлар ҳали давом этаётган бўлса-да, изланишлар натижаларига мувофиқ бирламчи хулосаларни қилиш мумкин:
- текширилган беморларда, қабул қилинган вакциналар туридан қатъи назар, антитаналарнинг етарли миқдори ишлаб чиқарилган;
- вакциналарнинг иккинчи дозасини қабул қилиш антитаналар миқдорининг сезиларли даражада ўсишига олиб келган;
- ZF-UZ-VAC2001 вакцинасини қабул қилган шахслар гуруҳининг натижалари бошқа турдаги вакциналарни қабул қилган шахсларнинг натижаларига тўла мос келади;
- ZF-UZ-VAC2001 аҳолини COVID-19га қарши эмлаш учун самарали ва ишончли вакцина ҳисобланади;
- COVID-19 га қарши эмлаш касалликнинг осойишта кечиши ва оғир ҳолатлар сонининг кескин камайишига имкон яратади.
Изоҳ (0)