AQSh 12-sentabr kuni afg‘on uchuvchilarini O‘zbekistondan olib chiqishni boshlagani haqida xabar berilgandi. O‘zbekiston Tashqi ishlar vazirligining rasmiy vakili Yusuf Kabuljanov afg‘onistonlik harbiy xizmatchilar va fuqarolar O‘zbekistondan olib chiqilganini tasdiqladi, deya xabar bermoqda “Gazeta.uz”.
“Afg‘onistondagi so‘nggi voqealar tufayli bir guruh sobiq harbiy xizmatchilar va Afg‘oniston fuqarolari O‘zbekiston davlat chegarasini noqonuniy kesib o‘tgan va qo‘lga olingan edi. 12−13-sentabr kunlari O‘zbekiston hududida joylashgan barcha afg‘on fuqarolari boshqa mamlakatga evakuatsiya qilindi”, — deya ma’lum qildi Yusuf Kabuljanov.
Gap Afg‘oniston Harbiy havo kuchlariga tegishli vertolyot va samolyotlarda O‘zbekistonga qochib o‘tgan afg‘on uchuvchilari haqida ketmoqda. 16-avgust kuni O‘zbekiston Bosh prokuraturasi mamlakat havo makonining ichida 585 nafar afg‘on harbiy xizmatchisi bo‘lgan 22 ta harbiy samolyot va 24 ta vertolyot kesib o‘tgani to‘g‘risida xabar bergandi (keyinroq oxiriga qadar tekshirilmaganini ma’lum qilgan). Kuzatuv davomida Embraer-314 va MiG-29 samolyotlari to‘qnashib, Surxondaryo viloyatining Sherobod tumani hududiga qulagan.
WSJ’ning yozishicha, AQSh afg‘on uchuvchilari borasida O‘zbekiston bilan kelishuvga erishdi. Kelishuvga ko‘ra, O‘zbekistonga qochib kelgan bir guruh afg‘on Harbiy havo kuchlari uchuvchilari oilalari bilan shu hafta oxirida Amerika harbiy bazasiga o‘tkaziladi.
Izoh (0)