O‘zbekistondagi afg‘onistonlik uchuvchilar AQShning Dohadagi harbiy bazasiga olib ketiladi. Bu haqda 11-sentabr kuni The Wall Street Journal gazetasi xabar berdi.
Gap Afg‘oniston Harbiy havo kuchlariga tegishli vertolyot va samolyotlarda O‘zbekistonga qochib o‘tgan afg‘on uchuvchilari haqida ketmoqda. 16-avgust kuni O‘zbekiston Bosh prokuraturasi mamlakat havo makonining ichida 585 nafar afg‘on harbiy xizmatchisi bo‘lgan 22 ta harbiy samolyot va 24 ta vertolyot kesib o‘tgani to‘g‘risida xabar bergandi (keyinroq oxiriga qadar tekshirilmaganini ma’lum qilgan). Kuzatuv davomida Embraer-314 va MiG-29 samolyotlari to‘qnashib, Surxondaryo viloyatining Sherobod tumani hududiga qulagan.
WSJ’ning yozishicha, AQSh afg‘on uchuvchilari borasida O‘zbekiston bilan kelishuvga erishdi. Kelishuvga ko‘ra, O‘zbekistonga qochib kelgan bir guruh afg‘on Harbiy havo kuchlari uchuvchilari oilalari bilan shu hafta oxirida Amerika harbiy bazasiga o‘tkaziladi.
Uchuvchilarning o‘zi “Tolibon” barcha amaldorlar va harbiylarga va’da bergan amnistiyaga qaramay, o‘zlari va oilalari xavfsizligidan qo‘rqadi. Nashr ma’lumotlariga ko‘ra, O‘zbekistonda jami 585 afg‘on uchuvchisi, ekipaj a’zolari va ularning qarindoshlari bor. Bu odamlar “AQShning Dohadagi harbiy bazasiga uchib ketishi” kutilmoqda, lekin ularning AQShga yoki boshqa joyga borishi aniq emas.
Gazetaga ko‘ra, Termizda Afg‘onistondan kelgan 46 ta harbiy samolyot va vertolyotning keyingi taqdiri noma’lumligicha qolmoqda. “Tolibon” samolyotni Afg‘onistonga qaytarishga chaqirmoqda, lekin bunday harakat AQShning qarshiligiga uchrashi mumkin.
“Tolibon” vakili Suhayl Shahin O‘zbekistonga qochgan afg‘on uchuvchilarini qaytarish zarurligini aytgan. “Bu uchuvchilar o‘z mamlakatiga qaytishlari kerak, Afg‘oniston ularga muhtoj. Biz mamlakatimizni endigina tiklashni boshlayapmiz. Dunyo ahli Afg‘onistonni qayta qurish va xalqimizning iqtisodiy farovonligiga to‘sqinlik qilmasdan, bizga yordam berishi kerak”, — degan u.
Avgust oyi oxirida The Wall Street Journal nashri rasmiy manbalarga tayanib, O‘zbekiston hukumati AQShni bir guruh yuqori malakali afg‘on uchuvchilari va ularning oilalarini mamlakatdan chiqarib yuborishga to‘g‘ri kelayotganidan ogohlantirgani haqida yozgan edi. O‘zbekiston “Tolibon” bilan “keskin munosabatlardan qochish” maqsadida AQShdan uchuvchilarni uchinchi mamlakatga ko‘chirish bo‘yicha tezkor choralar ko‘rishni so‘ragan.
Nashrning yozishicha, O‘zbekistonga qochgan afg‘on harbiylari “‘Tolibon’ning eng ashaddiy dushmanlaridan biri’ hisoblanadi, chunki ular o‘nlab yillar davom etgan to‘qnashuvlarda ko‘plab qurbonlar olib kelgan.
Izoh (0)