Ijtimoiy tarmoqlarda “Namanganda yangi mafiya paydo bo‘ldimi? Sudya, prokuror, IIB, hammasini ‘reshat’ qilarkan” izohi bilan video tarqaldi. Xabar yuzasidan Namangan viloyati IIB rasmiy munosabat bildirdi.
Qayd etilishicha, Uchqo‘rg‘on tumanida yashovchi A.J. 2020-yil 26-iyun kuni Uchqo‘rg‘on tumani ko‘p tarmoqli markaziy poliklinikasi oldida turmush o‘rtog‘i D.J.ni tanishi S.T. bilan birga turganligini ko‘rib, rashk qilgan va uyatli so‘zlar bilan haqorat qilib, S.T.ga tan jarohati yetkazgan.
Respublika shoshilinch tez yordam ilmiy markazi Namangan viloyati filiali Uchqo‘rg‘on tumanlararo ekspertining 2020-yil 4-iyuldagi xulosasida S.T.da chap ko‘krak qafasi, chap oyoq kaft usti sohasi shilinmasi ko‘rinishida bo‘lib, jarohat qarorda ko‘rsatilgan vaqt va voqelikka to‘g‘ri kelishi mumkinligi, og‘irlik darajasiga ko‘ra sog‘lig‘ining buzilishiga sababchi bo‘lmagan yengil tan jarohati ekani ko‘rsatilgan.
Mazkur holat yuzasidan Uychi tumani IIB huzuridagi tergov bo‘linmasi tomonidan tergovga qadar tekshiruv harakatlari o‘tkazilib, 2021-yil 27-mart kuni A.J.ga nisbatan Jinoyat kodeksining 277-moddasi 1-qismi (bezorilik) bilan jinoyat ishi qo‘zg‘atilgan.
2021-yil 3-mayda D.J.ga nisbatan sudga oid tibbiy ekspertiza tayinlangan. Mutaxassislarning xulosasida D.J.da burun suyagi o‘rta 1/3 qismining yopiq eski sinig‘i aniqlangani, ushbu jarohati bo‘yicha o‘z vaqtida tibbiy yordamga uchramaganligi sababli muddatini aniqlashning imkoni yo‘qligi, og‘irlik darajasiga ko‘ra sog‘lig‘ining buzilishiga sababchi bo‘lgan yengil tan jarohati ekanligi ko‘rsatilgan.
28-iyun kuni A.J.ga nisbatan Jinoyat kodeksining 277-moddasi 3-qismi “g” bandi (bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib sodir etilgan bezorilik) bilan ayb e’lon qilinib, unga nisbatan munosib xulq-atvorda bo‘lish haqidagi tilxat ehtiyot chorasi qo‘llangan.
Uychi tumani IIB huzuridagi tergov bo‘linmasi tomonidan 29-iyun sanasida jinoyat ishi Jinoyat protsessual kodeksining 381-moddasi (ayblov xulosasi yoki ayblov dalolatnomasi bilan kelgan jinoyat ishi yuzasidan prokuror hal etishi lozim bo‘lgan masalalar) tartibida ayblov xulosasini tasdiqlash va tegishli sudlov organiga yuborish masalasini hal etishlik uchun tuman prokuroriga yuborilgan va hozirda ushbu ish jinoyat ishlari bo‘yicha To‘raqo‘rg‘on tumani sudi tomonidan ko‘rib chiqilmoqda.
Shuningdek, fuqaro A.J. tomonidan huquqni muhofaza qiluvchi organlar haqida aytgan gaplari asossiz ekanligi va huquq-tartibot idoralariga hech qanday bosim bo‘lmagani ma’lum qilingan.
Izoh (0)