Buxoroda o‘zga bir fuqaroning arizasini ko‘rib chiqmaslik evaziga profilaktika inspektoriga pora bermoqchi bo‘lgan shaxs qo‘lga olindi. Bu haqda “Daryo”ga Bosh prokuratura huzuridagi iqtisodiy jinoyatlarga qarshi kurashish departamentining viloyat boshqarmasi xabar berdi.
Ta’kidlanishicha, Shofirkon tumanidagi “Chandir” mahallasida yashovchi 52 yoshli B.B. tanishi Sh.K.bilan o‘zaro kelishmovchilikka borgan. Tanishi ushbu kelishmovchilik yuzasidan Kogon tuman Ichki ishlar bo‘limi profilaktika inspektoriga yozma ravishda murojaat qilgan.Orada nizo bo‘lgani uchun ayb o‘zidaligini bilgan va qarama-qarshi tomon arizasi ko‘rilishidan xavotirlangan B.B. profilaktika inspektori orqali arizaning oldini olishga uringan. Profilaktika inspektori esa holat yuzasidan hujjat qonuniy o‘rganib chiqilishini, ariza e’tibordan chetda qolmasligini qayta-qayta ta’kidlagan. Shunga qaramasdan fuqaro pora taklif qilishda davom etgan.
2021-yilning 10-sentabr kuni taxminan soat 14:30 da fuqaro B.B. Kogon tumani Ichki ishlar bo‘limi profilaktika inspektoriga 100 dollar pora berayotgan vaqtida viloyat IIB shaxsiy xavfsizlik bosh boshqarmasi hamda viloyat huquqni muhofaza qiluvchi idoralari hamkorligida o‘tkazilgan tezkor tadbirda qo‘lga olingan.
Mazkur holat yuzasidan B.B.ga nisbatan Jinoyat kodeksining 211-moddasi (pora berish) bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)