Ижтимоий тармоқларда «Наманганда янги мафия пайдо бўлдими? Судья, прокурор, ИИБ, ҳаммасини ‘решат’ қиларкан» изоҳи билан видео тарқалди. Хабар юзасидан Наманган вилояти ИИБ расмий муносабат билдирди.
Қайд этилишича, Учқўрғон туманида яшовчи А.Ж. 2020 йил 26 июнь куни Учқўрғон тумани кўп тармоқли марказий поликлиникаси олдида турмуш ўртоғи Д.Ж.ни таниши С.Т. билан бирга турганлигини кўриб, рашк қилган ва уятли сўзлар билан ҳақорат қилиб, С.Т.га тан жароҳати етказган.
Республика шошилинч тез ёрдам илмий маркази Наманган вилояти филиали Учқўрғон туманлараро экспертининг 2020 йил 4 июлдаги хулосасида С.Т.да чап кўкрак қафаси, чап оёқ кафт усти соҳаси шилинмаси кўринишида бўлиб, жароҳат қарорда кўрсатилган вақт ва воқеликка тўғри келиши мумкинлиги, оғирлик даражасига кўра соғлиғининг бузилишига сабабчи бўлмаган енгил тан жароҳати экани кўрсатилган.
Мазкур ҳолат юзасидан Уйчи тумани ИИБ ҳузуридаги тергов бўлинмаси томонидан терговга қадар текширув ҳаракатлари ўтказилиб, 2021 йил 27 март куни А.Ж.га нисбатан Жиноят кодексининг 277-моддаси 1-қисми (безорилик) билан жиноят иши қўзғатилган.
2021 йил 3 майда Д.Ж.га нисбатан судга оид тиббий экспертиза тайинланган. Мутахассисларнинг хулосасида Д.Ж.да бурун суяги ўрта 1/3 қисмининг ёпиқ эски синиғи аниқлангани, ушбу жароҳати бўйича ўз вақтида тиббий ёрдамга учрамаганлиги сабабли муддатини аниқлашнинг имкони йўқлиги, оғирлик даражасига кўра соғлиғининг бузилишига сабабчи бўлган енгил тан жароҳати эканлиги кўрсатилган.
28 июнь куни А.Ж.га нисбатан Жиноят кодексининг 277-моддаси 3-қисми «г» банди (безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан айб эълон қилиниб, унга нисбатан муносиб хулқ-атворда бўлиш ҳақидаги тилхат эҳтиёт чораси қўлланган.
Уйчи тумани ИИБ ҳузуридаги тергов бўлинмаси томонидан 29 июнь санасида жиноят иши Жиноят процессуал кодексининг 381-моддаси (айблов хулосаси ёки айблов далолатномаси билан келган жиноят иши юзасидан прокурор ҳал этиши лозим бўлган масалалар) тартибида айблов хулосасини тасдиқлаш ва тегишли судлов органига юбориш масаласини ҳал этишлик учун туман прокурорига юборилган ва ҳозирда ушбу иш жиноят ишлари бўйича Тўрақўрғон тумани суди томонидан кўриб чиқилмоқда.
Шунингдек, фуқаро А.Ж. томонидан ҳуқуқни муҳофаза қилувчи органлар ҳақида айтган гаплари асоссиз эканлиги ва ҳуқуқ-тартибот идораларига ҳеч қандай босим бўлмагани маълум қилинган.
Изоҳ (0)