Toshkent viloyatida alimentdan qarzi bor erkak tomonidan pichoqlangan ayolning ahvoli haqida ma’lumot berildi

Toshkent viloyati Yangiyo‘l tumanida alimentdan qariyb 12 million so‘m qarzdorligi bor erkak turmush o‘rtog‘ini MIB bo‘limida pichoqlagani haqida xabar berilgandi. Viloyat hokimligi axborot xizmati ayolning hozirgi ahvoli haqida ma’lumot berdi.

Ma’lum qilinishicha, 2021-yil 10-sentabr kuni Yangiyo‘l tibbiyot birlashmasiga 1980-yilda tug‘ilgan fuqaro Sh.A. sobiq turmush o‘rtog‘i bilan MIB bo‘limidagi kelishmovchiligi oqibatida badaniga yetkazilgan og‘ir tan jarohatlari bilan tez tibbiy yordam mashinasida qabul bo‘limiga olib kelingan.

“Bemor ko‘zdan kechirilganda hushini yo‘qotgan, qo‘lida, badanida kesilgan jarohatlar mavjudligi, tashqi qon ketish alomatlari kuzatilib turgani sabab zudlik bilan jarrohlik amaliyotiga olindi. Amaliyot davomida ko‘zdan kechirilganda bemorda qon tomirlari uzilishi aniqlangani hisobga olinib, respublika qon-tomir jarrohlari yordamga chaqirildi.

O‘tkazilgan jarrohlik amaliyotidan so‘ng bemor umumiy reanimatsiya bo‘limida davo muolajalarini olmoqda. Unda nisbatan ijobiy o‘zgarishlar kuzatiladi. Yengil karaxtligi bor, yengil harakatlarni bajarishni boshlagan. Sog‘lig‘i to‘laqonli tiklanmagani sababli sun’iy nafas oldirish apparatida qolmoqda. Bemor belgilangan standartlar asosida davolanmoqda”, — deydi tuman tibbiyot birlashmasi jonlantirish bo‘limi mudiri Sattor Yusupov.

Eslatib o‘tamiz, Yangiyo‘l tumanlararo sudining 2021-yil 20-yanvardagi ijro varaqasiga asosan qarzdor A.O.dan, undiruvchi Sh.A. foydasiga voyaga yetmagan 3 nafar farzandi moddiy ta’minoti uchun daromadining yarmi miqdorida aliment undirish belgilangan.

Ijro hujjati yuzasidan olib borilgan majburiy ijro harakatlari davomida, qarzdor aliment to‘lovlarini to‘lashdan bo‘yin tovlab kelib, 2021-yil 10-sentabr holatiga qarzdorligi 11 million 864 ming so‘mni tashkil etgan.

Shu sababli, ijro harakatlari davomida, davlat ijrochisi B.Ismatillayev tomonidan qarzdor O.A.ga aliment to‘lovlarini to‘lashdan bo‘yin tovlagani sababli, unga nisbatan Ma’muriy javobgarlik to‘g‘risidagi kodeksning 47-4-moddasiga (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) asosan ma’muriy javobgarlik masalasini ko‘rib chiqish uchun sudga taqdim etishi haqida ma’lum qilingan.

Shundan so‘ng, 2021-yilning 10-sentabr kuni MIB Yangiyo‘l shahar bo‘limiga qarzdor O.A. va Sh.A. tashrif buyurgan.

Davlat ijrochisi hujjatlarni rasmiylashtirish jarayonida, qarzdor O.A. o‘zi bilan yashirib olib kelgan oshxona pichog‘i bilan kutilmaganda undiruvchi Sh.A.ga tashlanib, uning tanasining qo‘l va yelka qismlariga bir necha tan jarohati yetkazgan.

Tan jarohati olgan fuqaro Sh.A. zudlik bilan tez yordam brigadasi orqali shifoxonaga yetkazilgan.