АҚШ федерал қидирув бюроси 2001 йил 11 сентябрь терактларига оид биринчи ҳужжатни эълон қилди. Аввалроқ мамлакат президенти Жо Байден сентябрь воқеаларига алоқадор махфий ҳужжатларни эълон қилишни буюрганди.
16 варақли ҳужжат 2016 йил 4 апрелда рўйхатга олинган ва унинг матни купюралар билан ёзилган. Associated Press’нинг ёзишича, ҳужжатда АҚШдаги Саудия Арабистони фуқаролари билан тез-тез гаплашиб турган кимсанинг кўрсатмалари киритилган. Сўроқ 2015 йилда ўтказилган.
Ҳужжатда террорчиларнинг АҚШдаги саудиялик шериклари билан алоқалари ҳақида батафсил ахборот берилган, аммо Саудия Арабистонининг юқори лавозимдаги вакилларининг ушбу фитнага алоқадорлиги юзасидан далил-исботлар келтирилмаган.
Аввалроқ АҚШдаги Саудия Арабистони элчихонаси 11 сентябрдаги терактлар бўйича махфий ҳужжатларнинг эълон қилинишини олқишлаган ва бу «қиролликни асоссиз айблашларга узил-кесил чек қўйишини» қайд этганди. Элчихонада терактларга Саудия Арабистони ҳукуматининг алоқадорлиги ҳақидаги барча тахминларни ёлғон деб атаган.
2001 йил 11 сентябрда терактлар содир этган 19 нафар террорчининг 15 нафари Саудия Арабистони фуқаролари бўлган. Қироллик терактлар учун масъулиятни зиммасига олишдан бош тортган.
Изоҳ (0)